ماہنامہ عبقری - ستمبر 2010ء

ہر پھول کا رنگ ہی جدا نہیں ہوتا بلکہ خوشبو بھی مختلف ہوتی ہے جو کہ ماحول کو معطر رکھتی ہے اور انسانی ذہن پر بڑے گہرے اثرات مرتب کرتی ہے ایسے اثرات جو ذہنی اور جسمانی بلکہ دلی مسرت کا باعث ہوتے ہیں۔ پھولوں کی بدولت پیدا ہونیوالے پاکیزہ جذبات روحانی آسودگی کا سبب بنتے ہیں اللہ تعالیٰ کی ربوبیت یوں تو کائنات کی ہر شے میں عیاں ہے لیکن خوش رنگ و خوشنما پھول قدرت کی صناعی کا بہترین مظہر ہیں اور جو خوبصورتی، دلکشی، رنگینی اور حساسیت قدرت نے پھولوں کو بخشی ہے اس کی مثال کہیں اور نہیں ملتی۔ رنگوں کی بہاریں بکھیرتے اور خوشبو لٹاتے پھول اس کائنات کا اصل حسن ہیں جو زمین کا زیور ہی نہیں بلکہ گھروں کی شان، محفلوں کا حسن، طب کا حصہ اور خوبصورتی کی علامت بھی ہیں۔ رنگوں میں جادو ہے اور پھولوں کی رنگینی انسانی عادات، مزاج اور شخصیت پر خاصی حد تک اثر انداز ہوتی ہے اور اس سائنسی دور میں بھی پھولوں اور رنگوں کی پراسراریت پر بہت کچھ دریافت کیا جاچکا ہے جبکہ یہ بات بھی ثابت ہوچکی ہے کہ پھولوں اور رنگوں کی پسندیدگی انسانی فطرت کے بہت سے پہلووں کو اجاگر کرتی ہے۔ پھولوں کی زبان یہ بات غلط نہیں ہے کہ پھول اظہار کا بہترین ذریعہ ہوتے ہیں جن کے ذریعہ ہم اپنے دلی جذبات و احساسات دوسروں تک بہ آسانی پہنچا سکتے ہیں لیکن شرط یہ ہے کہ مدمقابل بھی پھولوں کی خاموش زبان اور ان کے ذریعہ پیغامات کی ترسیل کو بخوبی سمجھتا ہو۔ مثال کے طور پر اگر کسی کو سرخ گلاب کا تحفہ پیش کیا جائے تو سمجھ لینا چاہیے کہ تحفہ دینے والا محض گلاب پیش نہیں کررہا ہے بلکہ اظہار محبت کررہا ہے یا اپنی چاہت سے آپ کو آگاہ کرنا چاہ رہا ہے۔ اسی طرح سفید پھولوں مثلاً چنبیلی، گل یاسمین اور موتیا کاتحفہ دینے والے پاکیزہ جذبات و احساسات کا اظہار کررہے ہوتے ہیں۔ زرد رنگ کے پھول پیش کرنا نفرت، رقابت اور حسد جیسے منفی جذبات کا مظہر سمجھا جاتا ہے اور نیلے رنگ کے پھول ایک سچے دوست کی دوستی کا اقرار ہوتے ہیں یعنی پھول اپنی خاموش زبان سے ان تمام جذبوں کا اظہار کردیتے ہیں جنہیں بیان کرنے کیلئے الفاظ تلاش کرنا پڑتے ہیں۔ پھولوں کے روحانی اثرات پھولوں کی بے شمار اقسام پر جب نگاہ جاتی ہے تو یہ جان کر عقل انسانی حیرت میں پڑجاتی ہے کہ ہر پھول کا رنگ ہی جدا نہیں ہوتا بلکہ خوشبو بھی مختلف ہوتی ہے جو کہ ماحول کو معطر رکھتی ہے اور یہ خوشبو انسانی ذہن پر بڑے گہرے اثرات مرتب کرتی ہے ایسے اثرات جو ذہنی اور جسمانی بلکہ دلی مسرت کا باعث ہوتے ہیں۔ پھولوں کی بدولت پیدا ہونے والے پاکیزہ جذبات روحانی آسودگی کا سبب بنتے ہیں اور ان کی رنگت کے علاوہ بھینی بھینی مہک اعصاب کو پرسکون کردیتی ہے۔ پھول اپنے اندر اتنی قوت رکھتے ہیں کہ انہیں سونگھنے اور چھونے سے اعصاب پر اچھے اثرات مرتب ہوتے ہیں بلکہ بعض مرتبہ انہیں دیکھ کر بھی دل شاد ہوجاتا ہے اور خراب موڈ میں تبدیلی آنے کیساتھ ساتھ بیماروں سے شفاءیابی کا احساس عیاں ہونے لگتا ہے۔ یہی وجہ ہے کہ بیماروں کو عام طور پر پھولوںکا تحفہ پیش کیا جاتا ہے جس سے انہیں ایک ان دیکھا سکون اور اطمینان ملتا ہے۔ شخصیت پر پھولوں کے اثرات بعض دوسری چیزوں کی طرح انسانی شخصیت پر پھولوں کے بڑے گہرے اثرات مرتب ہوتے ہیں اور تحقیق سے علم ہوتا ہے کہ محض پھولوں کی پسندیدگی کی بنیاد پر کسی شخصیت کے بارے میں بہت کچھ جانا جاسکتا ہے۔ اگر یقین نہ آئے تو اگلی سطروں پر موجود ان اہم پہلووں پر غور کریں اور اندازہ لگائیں کہ یہ بات کسی حد تک درست ہے۔ گلاب اس پھول کو پسند کرنے والے بڑے ذہین اور آزادی پسند ہوتے ہیں جن کی دلچسپیاں بے شمار مگر خیالات تبدیل رہتے ہیں۔ یہ سفر کے شوقین ہوتے ہیں اور نت نئی باتوں کے علاوہ اچھے خیالات میں دلچسپی رکھتے ہیں۔ جسمانی اور ذہنی تکالیف برداشت کرنے میں ماہر ایسے افراد جس قدر شدت سے محبت کرتے ہیں اتنی ہی شدید نفرت کا اظہار بھی کرتے ہیں۔ چنبیلی اس سفید رنگ کے پھول کو پسند کرنے والے افراد خوش و خرم طبیعت کے مالک لیکن بڑے گہرے اور پرسکون ہوتے ہیں جن میں ٹھہراو کی خاصیت بھی ہوتی ہے۔ نرگس اس خوبصورت پھول کے چاہنے والے وعدے کے سچے، دوستی اور محبت کے معاملے میں وفادار ہوتے ہیں اور اپنے مقاصد میں دوسروں کی مداخلت قطعی برداشت نہیں کرتے۔ فراخ دل ہونے کے ساتھ انہیں کوئی ذمہ داری سونپ دی جائے تو اسے بہت دیانتداری اور اعتماد کے ساتھ نبھاتے ہیں۔ سورج مکھی اپنے مزاج، گفتگو اور تقریر کے کمال سے دوسروں کو متاثر کرنے والے افراد جو قدرے مغرور مگر بے حد حساس بھی ہوتے ہیں سورج مکھی کو پسند کرتے ہیں۔ ایسے افراد میں شفقت کا مادہ بھی ہوتا ہے لیکن ساتھ ہی بزدلی بھی جن کی تعریف و توصیف یا حوصلہ افزائی کی جائے تو بے حد ممنون ہوتے ہیں‘ اپنے معاملات میں کسی قسم کی مداخلت قطعی برداشت نہیں کرتے مگر بظاہر نرم مزاج دکھائی دیتے ہیں۔ گیندا اس پھول کو پسند کرنے والے بے حد فیاض ہوتے ہیں اور زندگی کی حقیقتوں سے آگاہ جن میں وجدان کی صلاحیت ہوتی ہے۔ ہمیشہ سوچتے رہنا اور سنجیدہ نظر آنا ان کی خاصیت ہوتی ہے۔ موتیا اس پھول کی محبت میں مبتلا افراد دراصل محبت کے معاملے میں خاصے جذباتی ہوتے ہیں لیکن ساتھ ہی حقیقت پسند اور قدامت پسند بھی جن پر حالات کی تبدیلی بہت زیادہ اثرانداز نہیں ہوتی ہے۔ رات کی رانی رات کو مہکنے والے اس پھول کے شیدائی مضبوط قوت ارادی کے مالک اور توانائی سے بھرپور ہوتے ہیں۔ ہمدردی کے جذبات سے لبریز شخصیات کے حامل یہ افراد دوسروں کی رہنمائی خوش اسلوبی سے کرتے ہیں اور خطائیں معاف کرنے میں فراخی کا مظاہرہ کرتے ہیں۔ کنول ماحول دوست واحباب کا اثر قبول کرنے والے ایسے افراد بہت مضبوط قوت ارادی کے مالک اور ارادے کے پکے ہوتے ہیں اور ایک ہی وقت میں حقیقت پسند اور تخیلاتی بھی ہوسکتے ہیں اور اپنا کام پوری آزادی اور مکمل اعتماد کے ساتھ کرنا چاہتے ہیں۔ گل داودی دوستوں کے انتخاب میں اعلیٰ معیار کے قائل گل داودی پسند کرنے والے لوگ بہت صاف گو ہوتے ہیں اوروفادار بھی جبکہ دل میں جھانکنے کی حیرت انگیز صلاحیت کے حامل ہوتے ہیں۔ بے پناہ تخیلاتی قوت کے ساتھ جینے والے یہ افراد ہر بات کو راز سمجھ کر چھپاتے ہیں اور دوسروں کی رائے اور خیالات کو اہمیت دیتے ہیں۔ مینا اس پھول کو پسند کرنے والے افراد نیک اور پاک دامن ہوتے ہیں لیکن غلط راستے کا انتخاب کرلیں تو پھر اتنے ہی برے ہوجاتے ہیں۔ ایسے افراد بڑے ذہین اور ملنے جلنے والوں میں امتیاز کے حوالے سے مہارت رکھتے ہیں جن میں دوستی کا جذبہ بھی ہوتا ہے البتہ یہ کم آمیز بھی ہوتے ہیں۔ پچھلا صفحہ