محترم شیخ الوظائف صاحب السلام علیکم !میں اپنی والدہ کے روحانی و جسمانی مشاہدات لکھ رہی ہوں، انہوںنے مجھے ’’یَا حَفِیْظُ یَا سَلَامُ‘‘کے کمالات بتائےہیں، ہم یہ وظیفہ ہر چھوٹے بڑے کام کے لیے کرتے ہیں۔ اس لیے ہمیں اس کے بہت کمالات ملےہیں۔ چند پیش خدمت کررہی ہوں۔
پاگل خانے داخل کروا دیا گیا
ہماری چچی بہت زیادہ بیمار پڑگئی تھیں۔ ان کو ہسپتال لے کر گئے توڈاکٹروں نے کہا کہ ان کے دماغ پر اثر ہوگیا ہے۔ ان کو پاگل خانے میںداخل کروایا جائے۔ چچی نے خودکشی کرنے کی بھی کوشش کی اور ہسپتال والوں نے ان کو بڑی بڑی رسیوں سے باندھ دیا۔ جب میری والدہ ان کی عیادت کیلئے ہسپتال گئیں تو ’’یَا حَفِیْظُ یَا سَلَامُ‘‘ گیارہ مرتبہ پڑھ کر ان پر دم کیا اوراللہ سے دعا مانگی اور ان کو اللہ کے حوالے کرکے گھر واپس آگئیں۔ اگلے دن دوبارہ ملنے گئیں توان کی حالت حیران کن طور پر بہت بہتر تھی۔ ڈاکٹروں نے ان کو اگلے دن ہی نارمل قرار دے کرہسپتال سے چھٹی دے دی۔
بغیر آپریشن کے شفاء
ہمارے ہمسایہ میں ایک عورت بہت زیادہ بیمار تھی۔ ڈاکٹروں نے انہیں جگر کے آپریشن کا کہا تھاکہ ان کا جگر کا آپریشن ہوگا۔ میری والدہ ان کی عیادت کیلئے گئیں اور ان کوبھی اللہ کے حوالے کرکے ’’یَا حَفِیْظُ یَا سَلَامُ‘‘ والا وظیفہ پڑھ کر دم کیا۔ ماشاءاللہ اس وظیفے کی برکت سے آپریشن کے بغیر ہی ان کا مسئلہ حل ہو گیا۔ایک مرتبہ ہم پہاڑی علاقے سیر کے لئے گئے، جب وہاںسےگھر واپس آرہے تھے، ہماری پوری فیملی گاڑی میں تھی تو گاڑی کا پیٹرول ختم ہوگیا اور قریب کوئی پیٹرول پمپ بھی نہیں تھا۔ والدہ نے ہم سب سے کہا کہ ’’یَا حَفِیْظُ یَا سَلَامُ‘‘ پڑھیں۔ ہم اس وظیفے کی برکت سے بغیر پٹرول ڈلوائے پٹرول پمپ تک پہنچ گئے۔ ایک دفعہ ہمارے گھر میں بہت زیادہ چوہے آگئے اور چوہے بھی اس کمر ےمیں آئے جہاں ہمارا سارا سامان پڑا ہوا ہے۔ والد ہ اور ہم نے یا حفیظ یا سلام پڑھا۔ چوہے بغیر کوئی نقصان پہنچائے گھر سے چلے گئے۔ یہاں تک کہ ہم جب بھی چاول یا گندم لیتے ہیں تو ان پر انگلی کے اشارے سے یا حفیظ یا سلام لکھ دیتے ہیں۔ ان میں پورا سال بلکہ جب تک وہ چیز ختم نہیں ہوتی اس میں کسی قسم کی کوئی کیڑا نہیں لگتا۔ماشاء اللہ سے ہمیں اس وظیفے پر بہت یقین ہے۔ ایک دن میں اپنے بابا کے ساتھ کالج جارہی تھی۔ابھی ہم تقریباً کالج کےپاس ہی تھے کہ ہمارا ایکسیڈنٹ ہوتے ہوتے بچا اور یہ کرشمہ صرف ’’یَا حَفِیْظُ یَاسَلَامُ‘‘ کی برکت سے ہوا۔جب سے ہمیں اس اسم کا پتہ چلا ہے ہم اس کو پڑھے بغیر گھر سے نہیں نکلتے ہیں۔ اس دن میں نے یہ پڑھا ہوا تھا۔