محترم حضرت حکیم صاحب السلام علیکم!جب سے تسبیح خانہ سے جڑا ہوں اللہ نے بہت نوازا ہے ۔ اپنے چند مشاہدات تحریر کر رہا ہوں‘ان شاءاللہ قارئین کو بھی نفع ہو گا۔
قرض سے نجات مل گئی
آپ نے چاشت کی دو رکعت نماز میں آخری دس سورتیں پڑھنے کے بے شمار فوائد بیان فرمائے تھے۔ میںنے چاشت کےنفل پڑھنا شروع کیے، جب سے میںیہ عمل کر رہا ہوں ، تنخواہ میں دن بدن اضافہ ہوتا جا رہا ہے۔ اللہ نے اپنا گھر دیا ہے اورایک وقت تھا کہ میں مقروض تھا لیکن اب حالات یکسر بدل چکے ہیں۔
گھر میں سلامتی چاہتے ہیں تو یہ عمل کریں
دوسرا عمل جو آپ اکثر بیان فرماتے ہیں ، گھر میں داخل ہوتے ہوئے سلام کرنے کے بعد ایک مرتبہ درود پاک اورسورہ اخلاص پڑھنی ہے ، میںمستقل یہ عمل کرتا ہوں اس عمل کی برکت سے اللہ نے اتنا دیا ہے کہ پہلے میں لینے والا تھا اب اللہ کے فضل سے اتنے پیسے ہیں کہ دوسروں کو دینے والا بن گیا ہوں، اللہ نے ایسا نظام چلایا ہے کہ لوگ کہتے ہیں کہ ان کے پاس پیسے آ کہاں سے رہے ہیں۔
گھر سے نکلتے ہوئے’’ یَا حَفِیظُ یَا سَلَامُ‘‘اور یہ دعا’’بِسْمِ اللّٰہِ عَلٰی دِیْنِیْ وَنَفْسِیْ وَوَلَدِیْ وَاَھْلِیِ وَمَالِیْ ‘‘ پڑھتا ہوں ، کبھی حادثہ یا چوٹ نہیں لگی، کئی بار تو خطرناک حادثہ ہوتے ہوتے بچ گیا ہوں ۔
ان سب اعمال اور وظائف کی طاقت اور تاثیر کا واضح  ثبوت یہ ہے کہ میرے جاننے والے جو تسبیح خانہ سے نہیں جڑے ہوئے وہ آج بھی وہیں ہیں جہاں چھ سات سال پہلے تھے بلکہ اس سے بھی نیچے چلے گئے ہیں جبکہ میں ترقی کی منازل طے کر رہا ہوں۔
پیشاب باربار آنے کا مسئلہ
کچھ عرصہ قبل سخت بخار میں مبتلا ہو گیا‘ کسی بھی طرح آرام نہیں مل رہا تھا ‘آخر بخار سے جب نجات ملی تو اس وجہ سے ہونے والی کمزوری نے پریشان کر دیا ‘جسم بے جان محسوس ہوتا تھامگر آپ کا بتایا ہوا ایک ٹوٹکہ استعمال کیا جس سےبہت نفع ہوا۔میںنے روزانہ پندرہ منٹ تک پاؤں اور اس کے تلوؤں ‘ ٹانگوںاور گھٹنوں کی مالش کرنا شروع کی ، چند ہی دن میں بخار کی ساری تکلیف دور ہو گئی، مجھےگھٹنوں سے نیچے پنڈلی میں بہت درد تھا ، پٹھے کھچے ہوئے تھے وہ نرم ہو گئے اور خون کی روانی آسانی سے ہونے لگی ۔
اگر کسی کو باربار پیشاب آتا ہو یا قطرہ قطرہ کر کے آتا ہو تو رات کوتخم بالنگو کا ایک چمچ ایک گلاس پانی میں بھگو کر رکھ دیں اور صبح اٹھ کر اس پانی کو نہار منہ پی لیں، تین چار دن میں مسئلہ حل ہو جاتا ہے۔
جلے کا قدرتی مرہم
اگر ہاتھ وغیرہ یا کوئی بھی جسم کا حصہ جل جائے تو فوراً تازہ ایلوویرا کا گودا لگانےسے جلن فوری ختم ہو جاتی ہے اور داغ نہیں بنتا۔ عبقری قارئین کے لئے یہ میرے ذاتی مجربات ہیں، استعمال کریں اوردعاؤں میں یا د رکھیں۔