بیٹی کے چہرے پر فالتو بال
مسئلہ:میری بیٹی کی عمر 12 سال ہے اس کے چہرہ پر باریل باریک بال ہیں جو عمر کے ساتھ ساتھ بڑھتے چلے جارہے ہیں‘بیٹی کے اس مسئلہ کی وجہ سے سخت پریشان ہوں کیونکہ سکول میں اس کی ہم جماعت لڑکیوں نے اس مسئلہ کااب مذاق بنانا بھی شروع کر دیا ہے‘ادویات وغیرہ استعمال کرنے سے فائدہ نہیں ہو رہا‘براہ کرم آپ کوئی ایسا دیسی نسخہ بتائیں جس سے بیٹی کا یہ مسئلہ حل ہو جائے۔(نازیہ‘کراچی)
مشورہ:آدھی پیالی آٹے میں ایک چمچ گھی اور دو چٹکی نمک ملا کر سخت گوندھ لیں۔پانی تھوڑا تھوڑا کر کے ملائیں۔اس آمیزے کا پیڑا بنا کر چہرے پر آہستہ آہستہ ملیں۔دن میں دو بار یہ عمل دہرائیں‘اس نسخہ کو کچھ عرصہ جاری رکھیں‘آہستہ آہستہ ان شاءاللہ چہرہ سے فالتو بالوں کا خاتمہ ہو جائے گا۔
شیر خوار بچے کی پریشانی
مسئلہ:میرا نو ماہ کا بیٹا ہے‘چند دنوں سے محسوس کر رہی ہوں کہ اس کا پیٹ نہیں بھرتا‘میں چاہتی ہوں کہ ابھی وہ ماں کا دودھ ہی پیتا رہے مگرکمی کی وجہ سے اس کی بھوک ختم نہیں ہوتی۔ کوئی ایسا ٹوٹکہ بتائیں جس سے دودھ بڑھ جائے ‘ بچےکو پوری غذا ملےتاکہ اس کی نشونما بہترین اور صحت برقرار رہے۔(شاہدہ‘راولپنڈی)
مشورہ :دنیا کے تمام معالج اس بات پر متفق ہیں کہ بیٹے کے لئے ماں کا دودھ ہی سب سے بہتر اور صحت کا ضامن ہے۔ دودھ بڑھانے کے لئے جَو کا دلیہ‘سبزیاں اور کھانا کھانے کے بعد مُٹھی بھر بادام اور کاجو کا استعمال کریں۔اس کے علاوہ بچے کوآدھا ابلا ہوا انڈاپھینٹ کر تھوڑا تھوڑا کر کےکھلائیں۔ اس کے علاوہ پسے چاول ایک بڑا چمچ لے کر اس کی کھیر بنا کر بچے کو کھلائیں‘بچہ صحت مند‘تندرست اور توانا رہے گا۔
آواز کی خرابی
گزشتہ ماہ مجھے نزلہ و زکام کی شکایت ہوئی اور اگلے ہی دن بخار ہو گیا‘ ڈاکٹر نے کچھ اینٹی بائیوٹک ادویات لکھ کر دیں جنہیں تین دن استعمال کرنے سے میں ٹھیک ہو گئی مگر اب آواز میں بھاری پن محسوس ہوتا ہے‘کھنکار کر بولتی ہوں‘بعض دفعہ آواز بالکل بیٹھ جاتی ہے‘ادویات استعمال کر کے دیکھ لیں مگر کوئی فائدہ نہ ہوا۔اس مسئلہ کی وجہ سے احساس کمتری کا شکار ہو رہی ہوں‘ کسی سے بات کرتے ہوئےجھجک محسوس ہوتی ہے‘کئی طبی معائنے کروا چکی ہوں مگر اس کے باوجود بھی افاقہ نہیں ہو رہا۔آپ سے درخواست ہے کوئی ایسا طریقہ بتائیں جس سے یہ مسئلہ حل ہو جائے۔(منیبہ واجد‘کراچی)
مشورہ:یہ مسئلہ اتنا زیادہ پیچیدہ نہیں ‘زیادہ پریشان نہ ہوں‘آپ کا یہ مسئلہ ان شاءاللہ جلد حل ہو جائے گا۔ٹھنڈی اور کھٹی چیزیں کھانے سے اکثر لوگوں کے ساتھ یہ مسئلہ پیش آتا ہے۔آپ ایسا کیجئے کہ مصری کا ایک ٹکڑا‘ملٹھی کے دو ٹکڑے اور خولنجان سے پان کی جڑ بھی کہتے ہیں اس کا ایک ٹکڑا منہ میں رکھ کر چوستے رہیں۔گھنٹے سے دو گھنٹے کے بعد انہیں منہ سے نکال کر پھینک دیں اور دوسرے ٹکڑے منہ میں رکھ کر چوستےر ہیں۔اس طریقہ علاج سے ایک دن میں ہی عموماً مسئلہ حل ہو جاتا ہے‘اگر پوری طرح مسئلہ حل نہ ہو تو مزید چند دن اس ٹوٹکہ کا استعمال کر لیں‘ ان شاءاللہ مسئلہ حل ہو جائے گا‘ آواز پہلے کی طرح صاف ہو گی۔
نئے کپڑوں پر چائے کے داغ
مسئلہ :میرے شوہر کے نئے سفید کپڑوں کے جوڑے پر چائے کے داغ لگ گئے‘انہیں اتارنے کی کافی کوشش کی مگر ناکام رہی‘سوٹ بھی نیا اورقمیتی ہے۔اس مسئلہ کا کوئی آسان حل بتادیجئے۔(عالیہ ناصر‘سکھر)
مشورہ:کپڑوں پر چائے گرے تونمک لے کر فوری چائے کے دھبوں پر ڈال دییجئے‘پھر صابن سے کپڑوںکو دھولیں تو داغ نہیں لگے گایا پھر تھوڑا سا امونیاپانی میں ملا کر داغ والا حصہ اس میں بھگو دیں۔اگر بچے قالین پر چائے گرادیں تو فوری پسا ہوا نمک چھڑک کر برش سے صاف کرلیں۔