محترم شیخ الوظائف صاحب السلام علیکم!اپنے چند مشاہدات عبقری قارئین کی خدمت میں پیش کر رہی ہوں۔
ہر درد اور تکلیف میں مفید
ایک بار آپ سے ہلدی کے بہت سے فوائد سنے تو انہیں مختلف امراض کی صورت میں آزمایا اور واقعی سو فیصد مجرب پایا۔اب گھر میں ہر وقت خصوصاً سردی کے موسم خالص ہلدی پسوا کر گھر میں رکھ لیتے ہیں۔سرد موسم میں روزانہ دودھ میں ایک چمچ ہلدی ڈال کر پیتے ہیں اس وجہ سے گھر کے تمام افراد بڑے ہو یا بچے سب بیماریوں سے محفوظ رہتے ہیں ‘حتیٰ کہ خواتین ٹھنڈے پانی میں کام یعنی کپڑے وغیرہ دھونے کے باوجود بھی انہیں سردی نہیں لگتی اور نہ ہی بیمار ہوتی ہیں۔پہلے تھوڑا سا کام کرنے سے بہت زیادہ تھکاوٹ محسوس ہوتی تھی مگر اب الحمدللہ سارا دن کام کرنے کے باوجود بھی تھکاوٹ کا احساس تک نہیں ہوتا۔اگر کوئی موچ وغیرہ بھی آجائے یا چوٹ لگ جائے تو درد کا زیادہ احساس نہیں ہوتا۔جب سے ہلدی کا استعمال کرنا شروع کیا ہے سستی اور کاہلی کا خاتمہ ہو گیا ہے۔چہرے کی رنگت ایسی نکھری ہے کہ سب حیران ہیںحالانکہ بعض خواتین چہرے کی رنگت کو نکھارنے کے لئے مختلف بازاری بیوٹی کریموں کا استعمال کرتی ہیں مگر ہلدی کے استعمال سے کبھی ان چیزوں کی ضرورت محسوس نہیں ہوئی۔اس کے علاوہ اگر کسی خاتون کو ماہانہ ایام میں بہت زیادہ تکلیف ہوتی ہو یا ایام کی بے قاعدگی کی شکایت ہو تو ایسے مسائل سے نجات کے لئے اگر وہ ہلدی کا ایک چمچ دودھ میں ڈال کر استعمال کرنا شروع کردیں تو یہ مسائل بھی ختم ہو جاتے ہیں۔
خاندانی شفائی نسخہ
میرے دادا ابو کو کسی نے یہ عمل بتایا تھا کہ اگر تیز بخار ہو اور کسی بھی دوائی سے افاقہ نہ ہورہا ہو تو مریض کے سرہانے باوضو کوئی شخص یا چند افراد مل بیٹھ کر دس تسبیح سورئہ انبیاء کی آیت یٰنَارُ كُوْنِیْ بَرْدًا وَّ سَلٰمًا عَلٰی اِبْرٰهِیْمَo کی پڑھ کر مریض پر دم کریں اور پانی پر دم کر کے وہ پانی مریض کو پلاتےرہیں تو جلد ہی مریض اللہ کے فضل سے شفاء پاتا ہے اور مکمل صحت یاب ہو جاتا ہے۔یہ عمل سالہا سال سے ہمارے خاندان کا آزمودہ ہےحتیٰ کہ ڈینگی بخار ‘موسمی اور ہر طرح کے بخار کی صورت میں اس عمل کا تجربہ کیا ہے‘اللہ تعالیٰ نے شفائےکاملہ عطا فرمائی ہے۔