محترم حضرت حکیم صاحب السلام علیکم!عبقری رسالہ گزشتہ تقریباً آٹھ سال سے پڑھ رہا ہوں‘میں ایک ڈینٹسٹ ہوں‘ اپنے شہر میں پریکٹس کرتا ہوں۔ عبقری سے چونکہ محبت ہے تو جو بھی ایسی چیز ملتی ہے جس سے مخلوق خدا کو نفع ہو عبقری قارئین کیلئے ضرور بھیجتا ہوں۔ ابھی کل ہی میرے کلینک پر ام القریٰ یونیورسٹی مکہ مکرمہ کے ایک شیخ اپنے دانتوں کے علاج کیلئے تشریف لائے۔ جو پندرہ کتابوں کے مصنف اور ایک جہاندیدہ انسان تھے۔ باتوں باتوں میں بتانے لگے کہ میں اپنا علاج ہمیشہ دیسی چیزوں سے کرتا ہوں کیونکہ اللہ تعالیٰ نے دیسی جڑی بوٹیوں اور قدرتی غذاؤں میں جو شفابخش فوائد رکھے ہیں، وہ کسی دوائی سے نہیں ملتے۔ چند سال پہلے مجھے یورک ایسڈ کامسئلہ ہوگیا۔ میں نے مکہ مکرمہ کے ہسپتال سے علاج کروایا، مگر کوئی خاطرخواہ افاقہ نہ ہوا۔ پھر میں نے سرچ کی تو پتہ چلا کہ اللہ پاک نے یورک ایسڈ سے نجات پانے کی سند مولی کے اندر چھپا رکھی ہے۔ لہٰذا میں نے روزانہ بلاناغہ ایک عدد مولی کھانا شروع کردی۔ آپ یقین جانیے کہ صرف ایک ہفتہ مولی کھانے سے میرا وہ مسئلہ ایسا ختم ہوا کہ آج تک دوبارہ نہیں ہوسکا۔ پھر میں نے اپنے
دوست احباب کو بھی یہی نسخہ بتایا ۔ ان میں سے یورک ایسڈ کے مارے ہوئے ایسے افراد بھی حیرت انگیز طور پر صحت یاب ہوگئے، جو دیوار کا سہارا لے کر چلنے پر مجبور ہوچکے تھے۔ بستر سے اٹھتے ہوئے گھبراتے تھے۔ ہر وقت ٹانگوں میں درد اور پاؤں میں سوجن کی وجہ سے معذور ہوتے جارہے تھے مگر روزانہ ایک مولی کھانے سے وہ بالکل تندرست ہوگئے۔میں حیرانی سے ان کا چہرہ تک رہا تھا‘ میں نے جلدی سے کاپی قلم اٹھایا ان کی تمام داستان لکھی اور ساتھ ہی پوچھا کہ طریقہ استعمال کیا ہے؟ تو مسکراتے ہوئے کہنے لگے: روزانہ کسی بھی وقت ایک عدد مولی کھائیں، مگر اس میں ناغہ مت کریں۔ یہ سستی سی چیز آپ کو ایسا زبردست رزلٹ دے گی کہ آپ خود حیران رہ جائیں گے۔