محترم حضرت حکیم صاحب السلام علیکم! اللہ اور اس کے حبیب نبی کریم ﷺ آپ سے ہمیشہ راضی رہیں۔ عبقری ہمارے گھر2007ء سے آرہا ہے اور ہم ہر ماہ بڑی شدت سے انتظار کرتے ہیں۔ ہمارے والد محترم کو وفات پائے 21 سال ہوگئے ہیں ہم دو بہنیں اور والدہ صاحب ہیں‘ ہمارے بھائی نہیں ہیں۔ ہمارے والد محترم نے ہمیشہ ہمیں حلال رزق سے کھلایا انہوں نے کبھی بھی حرام نہیں کمایا حالانکہ ہمارے والد محترم اکاؤنٹ آفیسر تھے‘ والد محترم کے ایک دستخط پر پورے شہر کے ملازمین کو تنخواہ ملتی تھی مگر خود بے حد ایماندار تھے۔ والد محترم کی تنخواہ سے جو کٹوتی ہوتی تھی جسے جی پی فنڈ کہتے ہیں والد صاحب جتنی رقم تنخواہ سے کٹتی تھی وہی جمع کی ہوئی لیتے تھے اوپر کی منافع والی رقم کو والد صاحب سود کہتے تھے‘ محترم حضرت حکیم صاحب! اگر میں والدمحترم کی ایمانداری کی باتیں لکھنا شروع کروں تو کافی ورق بھر جائیں گے صرف اتنی بات لکھوں لکھ رہی ہوں کہ جب والدصاحب وفات پاگئے تو خواب میں ان کی قبر ہم نے روضہ رسول ﷺ کے ساتھ دیکھی یعنی والد محترم کی قبر اور حضور نبی اکرم ﷺ کی قبر مبارک ایک ساتھ ہیں اور سارا علاقہ سرخ گلاب سے بھرا ہوا ہے یہ سب کرم والد صاحب کا درودشریف کثرت سے پڑھنے کا اور اب تک ہمارا رزق اللہ کے کرم سےحلال ہے۔ (ایک بیٹی‘ ڈیرہ اسماعیل خان)