جو شخص پہلے ہی چھلانگ لگا کر بڑے بڑے کام کرلیتا ہے وہ ہمیشہ ناکام رہتا ہے اور اس کی قوت ارادی بھی کمزور ہوجاتی ہے

قوت ارادی کیلئے سب سے پہلے صحت کا ہونا ضروری ہے۔ ایک بیمار جسم میں موجود دماغ بھی بیمار ہوجاتا ہے اور یوں قوت ارادی کم ہوجاتی ہے۔ اس میں اضافے کیلئے بہتر یہ ہے کہ پہلے چھوٹے چھوٹے کام لیے جائیں اور ان میں کامیابی حاصل کی جائے۔ جو شخص پہلے ہی چھلانگ لگا کر بڑے بڑے کام کرلیتا ہے وہ ہمیشہ ناکام رہتا ہے اور اس کی قوت ارادی بھی کمزور ہوجاتی ہے۔ عام طور پر صحت اور قوت ارادی میں رشتہ ضرور ہوتا ہے۔جسمانی صحت قوت ارادی کو بنانے اور سنوارنے میں بے حد اہمیت کی حامل ہے اور مختلف ذہنی امراض قوت ارادی کو لازماً نقصان پہنچاتے ہیں۔ قوت ارادی بڑھانے کا عمل شروع کرنے سے پہلے ہمیں اپنی جسمانی صحت کا بھرپور جائزہ لینا چاہیے۔ بُری اور نقصان دہ عادت کو چھوڑ کر صحت کے اصولوں پر عمل پیرا ہونا چاہیے (گو اس کام کیلئے قوت ارادی کی ضرورت پیش آئے گی) ہوسکتا ہے کہ ایسا کرنا آپ کے لیے وقت طلب ہو لیکن یہ سوچ کر آپ کو تسکین ہوسکتی ہے کہ ان اصولوں پر کاربند ہوکر آپ اپنی صحت کی افزائش ہی نہیں کررہے بلکہ قوت ارادی میں اضافہ کررہے ہیں۔ قوت ارادی کی افزائش کے سلسلے میں بعض ایسے سسٹم ہیں جنہیں ٹوٹکے کہا جاسکتا ہے۔ یہ صدیوں سے محض ذہنی ریاضتوں کے طریقے پر کام کرتےچلے آرہے ہیں لیکن مسلمان عبادت اور دعا کے ذریعے بہت زیادہ قوت ارادی کے مالک بن سکتے ہیں۔ارادے کی مشکل کیلئے باقاعدگی سب سے اہم چیز ہے۔ اگر آپ جس وقت جی چاہے مشق کریں تو اس کا آپ کو کوئی فائدہ نہ ہوگا۔ قوت ارادی کی نشوونما میں صبح سویرے اٹھنا خاص اہمیت کا حامل ہے اس سے آدمی میں جوش اور ولولہ پیدا ہوتا ہے اور اس کو دن بھر کام کرنے کیلئے اکساتا ہے۔ بُری اور نقصان دہ عادات ترک کرنے کیلئے شروع شروع میں کافی دقت کا سامنا کرنا پڑتا ہے۔ اور قوت ارادی کے بغیر یہ چیز ناممکن ہے لیکن جب چند مرتبہ کوئی کام دہرایا جائے تو پھر اس کام کی عادت پڑجاتی ہے اور وہ کام اتنا مشکل نظر نہیں آتا۔ آپ روزانہ اپنے ارادوں کی مشق کیجئے۔ ہر روز کچھ دیر اس کام میں لگائیں یہ مشق نہ صرف قوت ارادی کی نشوونما میں مفید ثابت ہوگی بلکہ پوری شخصیت کی بناوٹ میں فائدہ مند ہے۔