یتیم لڑکی سے میری شادی کردی جب میں نے دلہن کو دیکھا تو اس کے گلے میں وہی موتیوں کا ہار تھا جو مدینے کی گلیوں میں مجھے ملا تھا

مشہور صحابی حضرت کعب بن مالک رضی اللہ عنہٗ کی اولاد میں ابوبکر رحمۃ اللہ علیہ نامی ایک بزرگ گزرے ہیں جوکہ آخری عمر میں بہت مالدار ہوگئے تھے لوگوں نے ان کی مالداری کا سبب پوچھا تو انہوںنے اپنا واقعہ سنایا۔ایک دن میں مدینے کی گلیوں میں پھررہا تھا کہ مجھے راستے میں ریشم کی ایک خوبصورت تھیلی ملی۔ میں وہ تھیلی لے کر گھر آگیا‘ کھول کر دیکھا تو اس میں سچے موتیوں کا ہار تھا‘ بہت قیمتی تھا‘ میں نے عہد کرلیا کہ یہ اس کے مالک تک ضرور پہنچاؤں گا۔ یہ سوچ کر گھر سے باہر نکلا تو میں نے ایک بوڑھے شخص کو تھیلی تلاش کرتے ہوئے پایا۔ میں نے معلومات لے کر ان کو وہ امانت واپس کردی۔ بوڑھے نے خوشی میں پچاس دینار دینا چاہے مگر میں نے وہ نہ لیے حالانکہ میں ضرورت مند بھی تھا۔ میں نے کہا اس کا صلہ میں اپنے رب سے لینا چاہتا ہوں۔کچھ عرصے بعدمیں ایک جہاز میں سفر کررہا تھا کہ جہاز طوفان کی زد میں آکر تباہ ہوگیا۔ میں ایک تختے کے سہارے بہتا ہوا بڑی مشکل سے کنارے تک پہنچا۔ یہ ایک گاؤں تھا قریب ایک مسجد نظر آئی میں نے مسجد میں جاکر نماز ادا کی اور قرآن پاک کی تلاوت کرنے لگا وہاں کے لوگوں نے جب قرآن پاک سنا تو سب اردگرد جمع ہوگئے پھر ان لوگوں نے مجھے قرآن پاک کی تعلیم دینے کیلئے وہاں روک لیا۔ ان لوگوں نے ایک یتیم لڑکی سے میری شادی کردی جب میں نے دلہن کو دیکھا تو اس کے گلے میں وہی موتیوں کا ہار تھا جو مدینے کی گلیوں میں مجھے ملا تھا۔ میں بہت حیران ہوا اس سے اس کے متعلق پوچھا تو اس نے بتایا یہ ہارمیرے باباجان کا تھا۔ گاؤں والوں نے بھی اس بات کی تصدیق کی اور بتایا کہ وہ بزرگ کہا کرتے تھے میں نے اپنی ساری زندگی میں ایک امانت دار مسلمان کو دیکھا ہے اگر وہ نوجوان مجھے مل جائے تو میں اپنی بیٹی کی شادی اس سے کردوں۔ اللہ تعالیٰ نے ان کی دعا قبول کرلی اور اس سے میری شادی ہوگئی۔ میں برسوں اسی گاؤں میں رہا پھر میری بیوی کا انتقال ہوگیا اس کے ترکہ میں یہ ہار مجھے مل گیا میں نے کئی لاکھ میں اس کو بیچا اور اس سے تجارت شروع کردی۔ اللہ تعالیٰ نے تجارت میں مجھے برکت دی آج کل جو مال و دولت میرے پاس ہے وہ اسی ہار اور میری اللہ کی رضا کیلئے کی گئی نیکی کا صلہ میں ملی ہے۔