محترم شیخ الوظائف صاحب السلام علیکم!میں حکمت کے شعبے سے وابستہ ہوں، یہ ہمارا خاندانی پیشہ ہے۔گزشتہ چند سالوں سے عبقری کا مستقل قاری ہوں۔ عبقری میں حکمت کے ایسے ایسے راز ہوتے ہیں کہ پڑھ کر حیران ہو تا ہوں کہ اتنے قیمتی نسخے اس طرح عام کر دیے ہیں جبکہ اس نسخوں کے ذریعے لاکھوں کمائے جا سکتے ہیں۔عبقری کی اسی سخاوت سے متاثر ہو کر میں بھی اپنے سینے کا راز آپ کو بتا رہا ہوں۔پچا س سال سے ایک نسخہ مسلسل تجربات میں ہے اور سو فیصد کامیاب نسخہ ہے۔ جن بچوں کو سوکھا پن ہو جائے اور جسم سوکھ کر کانٹا ہو جائے، ان کو کسی علاج سے فرق نہ پڑتا ہو اورجسم اتنا سوکھ جائے کہ ہڈیاں نظر آنا شروع ہو جائیں۔ بچہ بے حد کمزور ہو جاتا ہے حتیٰ کہ اس مرض میں مناسب علاج نہ ہونے پر بچوں کی موت واقع ہو جاتی ہے۔یہ مرض شیر خوار بچوں میں زیادہ اوربڑی عمر کے بچوں میں نسبتاً کم ہوتا ہے۔ اس کے لئے 50 سالہ تجربہ کے ساتھ نسخہ پیش خدمت ہے۔ ھو الشافی: 1 کلو گائے کا دودھ لے کر اس کی دہی بنا لیں اور ململ کے کپڑے میں ڈال کر اوپر سے باندھ کر اونچی جگہ لٹکا دیں۔ جب اس دہی سے سارا پانی نکل جائے اور چھاچھ رہ جائے تو اسے کسی برتن میں ڈال دیں اور آدھا پاؤ آملہ لے کر اس کا بالکل باریک سفوف بنا کر اس چھاچھ میں ملا کر اچھی طرح حل کر لیں، چاہے تو گولیاں بنا لیں یا سفوف کی شکل میں رہنے دیں۔ روزانہ دن میں چار بار 1رتی دودھ میں ملا کر دیں ، اگر بچہ ماں کا دودھ پیتا ہے توا سے ماں کے دودھ میں ملا کر پلا دیا کریں لیکن شرط یہ ہے کہ پہلے آٹھ دن یہ خوراک 1 رتی دیں ، دوسرے ہفتے 2 رتی دیں اور تیسرے ہفتے 3 رتی دیں ، چوتھے ہفتے 4 رتی دیں۔(ایک رتی 121 ملی گرام ہوتاہے)۔ان شاء اللہ ہر ہفتے واضح فرق محسوس ہو گا کہ بچہ موٹا تازہ ہو رہا ہے۔