محترم حضرت حکیم صاحب السلام علیکم! میں ایک روحانی سفر کے دوران ایک بزرگ سے ملا انہوںنے مجھے ایک وظیفہ بتایا ۔ یہ ان کا آزمودہ وظیفہ تھا۔ کوئی بھی حاجت ہو کوئی بھی کام اٹکا ہوا ہو کوئی ایمرجنسی ہو یہ عمل کریں ان شاء اللہ فوری رزلٹ ملے گا۔ان بزرگ نے بتایا کہ ہمارا ایک ہوٹل ہے۔ہوٹل کے نقشے کی منظوری کا مسئلہ تھا اور وہاں سے ایک سڑک بن رہی تھی اور ہوٹل کا کچھ حصہ سڑک میں آرہا تھا۔ ہمیں یہ کہا گیاکہ نقشہ منظور نہ ہوا توہوٹل گرا دیا جائے گا یا پھر بیس سے تیس لاکھ روپے میں خلاصی ہوگی۔بزرگ کہتے ہیں ہم نے متعلقہ دفتر جانے کا فیصلہ کیا اور وہاں افسر سے وقت بھی لے لیا۔وہاں جاتے ہوئےمیں قریب کی مسجد میں نماز پڑھنے گیا تو وہاں ایک جگہ یہ عمل لکھا تھا ، نماز سے فارغ ہو کر میں نے بیٹوںسے کہا میں یہ نفل پڑھ لوں پھر چلتے ہیں۔نفل پڑھے اور دعا مانگ کر ہم دفتر چلے گئے۔ آفس میں گئے ان سے بات کی تو انہوںنے بھی تیس لاکھ روپے کا مطالبہ کیاجبکہ ہمارے پاس صرف پانچ لاکھ تھے ۔ بزرگ کہتے ہیں کہ ابھی ہم بات ہی کر رہے تھے کہ ایک شخص آیا وہ میرے جاننے والا نکلااور معلوم ہوا کہ وہ وہاں سب کا افسر تھا باقی سب اس کے نیچے کام کرتے تھے ، وہ مجھ سے بہت محبت سے گلے ملے اور پوچھا آپ یہاں کیسے ، یہ میرا غریب خانہ ہے۔میںنے سارا مسئلہ بتایا اور یہ بھی کہ اتنے پیسے مانگ رہے ہیں جو کہ سراسررشوت ہے اور میرے پاس پیسے نہیں ہیں۔ اس افسر نے کہا آپ گھر جائیں اور کام کی پریشانی نہ لیں ، بزرگ فرماتے ہیں کہ میں گھر آ گیا اور تین دن بعد نقشہ منظور ہو کر گھر
آگیا اور یوں اللہ تعالیٰ نے اس عمل کی برکت سے نا ممکن کام ممکن کر دیا ۔عمل کا طریقہ : 2 نفل پڑھیں پہلی رکعت میں سورہ فاتحہ کے بعد 10 دفعہ سورہ الکافرون اور دوسری رکعت میں سورہ فاتحہ کے بعد11دفعہ سورہ اخلاص پڑھیں۔ پھر سلام پھیر کر تین دفعہ درود شریف پڑھیں اور 10 مرتبہ تیسرا کلمہ" سُبْحَانَ اللّٰهِ وَالْحَمْدُ لِلّٰهِ وَلَا اِلٰهَ اِلَّا اللّٰهُ وَاللّٰهُ اَكْبَرُ وَلَا حَوْلَ وَلَا قُوَّةَ اِلَّا بِاللهِ الْعَلِيِّ الْعَظِيْمِ "  10مرتبہ" رَبَّنَا اٰتِنَا فِی الدُّنْیَا حَسَنَةً وَّ فِی الْاٰخِرَةِ حَسَنَةً وَّ قِنَا عَذَابَ النَّارِ" اور 10 مرتبہ" أَسْتَغْفِرُ اللهَ الَّذِي لَا اِلٰهَ اِلَّا هُوَ الْحَيَّ الْقَيُّومَ وَاَتُوْبُ اِلَیْہ" پڑھیں پھر آخر میں 3 مرتبہ درود شریف پڑھ کردعا مانگیں،نا ممکن کام بھی ممکن ہو جائے گا۔