نظر بد‘کالاسفلی جادو‘خطرناک حادثات‘آفات و بلیات سے حفاظت کے لئے ایسا عمل جو صرف کسی کامل کی اجازت سے ہی کیا جائے۔ موجودہ دور مخدوش ہے‘ زندگی کے حادثات سے کوئی شخص محفوظ نہیں‘ تحفظ کے لیے اسماء نورانی کا خاص وظیفہ دیا جارہا ہے جو حادثات‘ نظربد‘ سحر‘ چوری‘ خوف‘ اغواء‘ جنات اور غرقابی سے محفوظ رکھتا ہے۔ برسوں اس عمل کے کرشمے صدہا مرتبہ اپنی آنکھوں سے دیکھے ہیں‘قارئین کی فرمائش پر اس خاص عمل کو شائع کیا جارہا ہے تاکہ دکھی‘ مجبور‘ در در کے بھکاری‘ بیماریوں سے عاجز زندگی کو سکھی بناسکیں۔
کالی دیوی کا جادو اور سفلی عمل دنیا کے طاقتور ترین جادو میں سے ایک ہے مگر نورانی اور قرآنی عملیات کے آگے جو ولیوںؒ اور اکابرینؒ کی اجازت سے کیا جائے چند دنوں میں ٹوٹ جاتا ہے‘ سفلی عمل بار بار حملہ آور ہوتا ہے اور اس سے بچنے کیلئے مسلسل اواردو وظائف‘ مسنون اعمال کی ضرورت ہوتی ہے۔ لہٰذا ادارہ عبقری آپ اور آپ کی نسلوں کیلئے ہر ماہ خاص ساعتوں کے حساب سے ایک خاص عمل‘ وظیفہ اور صدقہ بتائے گا جس کے کرنے سے آپ ان شاء اللہ زمینی و آسمانی مصائب سے محفوظ رہیں گے۔ لہٰذا ہر ماہ حفاظتی حصار کا عمل کرنا ہرگز نہ بھولیے۔
مئی2024ء کا طاقتور روحانی حصار
صبح نہار منہ تین گھونٹ پانی پئیں اورہر گھونٹ پینے سے پہلے ایک مرتبہ درود پاک اور سات مرتبہ اَللہُ شَافِیْ اَللہُ بَاقِیْ پڑھیں اور تصور کریں یہ پانی نور بن کر میرے جسم میںاتر رہا اور یہ نور شفاء اور حفاظت کا حصار ہے جو ہر بیماری‘جادو ، بندش ، نظر بد، مصیبت اورتکلیف کو جسم سے نکال دے گا۔اس عمل کےدوران اپنا‘ اپنے گھر والوں اور جان ومال کا بھی تصور رکھیں۔ان شاء اللہ حادثات‘ ان دیکھی آفات و بلاؤں اور بیماریوں سے حفاظت رہے گی اور اگر کوئی نقصان قسمت میں لکھا بھی ہے تو اللہ کریم کے پاک ناموں کی برکت سے وہ نقصان یا تو ہوگا نہیں یا انتہائی کم ہوگا کہ محسوس بھی نہ ہوگا۔
عمل کا ہدیہ:اس ماہ کسی بھی دن صرف ایک مرتبہ چاولوں کی کھیر بنا ئیں اور اس پر مذکورہ وظیفہ سات بار پڑ ھ کر دم کریں اوربچوں کو کھلا دیں۔ اس تمام عمل کا ثواب حضرت عبد اللہ بن مسعود رضی اللہ عنہ اور حضرت امام حسن عسکری سلام اللہ ورضوانہ علیہ کی ارواح مبارکہ کو ہدیہ کردیں۔یہ عمل ہر حالت میں کر سکتے ہیں۔
خاص ساعتوںکے حساب سے اگلے مہینے کے حفاظتی حصار کا عمل ’’رسالہ عبقری ماہ جون 2024ء ‘‘میں پڑھنا ہرگز نہ بھولیے!