انسانی زندگی میں جو چیز سب سے زیادہ اہم ہے وہ ’’صحت‘‘ ہے۔اگر انسانی کی صحت ٹھیک نہ ہو‘ بیماریوں کا شکار ہو تو وہ کوئی بھی کام ٹھیک طریقہ سے نہیں کرپاتا ‘ حتیٰ کہ دینی‘فلاحی اور بہت سے نیکی کے کاموں سے محروم ہو جاتا ہے۔زندگی گزارنے کے لئے ضروری ہے کہ انسان جسمانی اور روحانی دونوں طرح سے صحت مند ہو۔اگر صحت بہتر ہو تو انسان پریشان کن حالات کا مقابلہ آسانی سے کر لیتا ہے ۔ہم ہر وقت اپنے دل کو خوش تو نہیں رکھ سکتے لیکن اس کی کوشش کر سکتے ہیں کہ کم از کم دل کو مطمئن رکھیں۔غذائوں کے ساتھ کوشش کریں کہ روزمرہ زندگی میں لڑائی جھگڑوں سے اجتناب کریں۔دل میں کسی کے لئے حسد‘ کینہ اور بغض نہ رکھیں اور سب کے ساتھ مناسب برتائو کریں۔اچھے اخلاق کے ساتھ پیش آئیں۔اگر کوئی بیماری ہے تو اس کا علاج کروائیں۔ دوسرے اعضاء کی طرح آنکھ اور پائوں کا بھی خیال رکھیں۔صاف ستھری غذا بروقت کھائیں‘ یعنی بے وقت کھانے سے اجتناب کریں۔غذا میں سبزی کا زیادہ استعمال کریں۔مرچ‘چینی اور چائے کا استعمال کم کریں‘ تمباکو نوشی سے مکمل پرہیز کریں۔دودھ اور موسمی پھلوں کا استعمال باقاعدگی سے کریں۔کھانا بھوک لگنے پر کھائیں اور پیٹ بھر کر نہ کھائیں۔کھانا کھاتے ہوئے پیٹ خراب ہونے لگے تو کھانا فورا ً چھوڑ دیں‘ پھر بتدریج بحال کریں۔روزانہ ورزش یا کوئی ایسا کام ضرور کریں جس سے بدن کے تمام اعضاء حرکت میں آئیں۔وقتاً فوقتاً حجامت کرواتے رہیں۔سخت گرمی کی صورت میں روزانہ نہائیں‘کم گرمی اور سرد موسم کی صورت میں تین دن بعد لازمی غسل کریں۔کپڑے صاف ستھرے پہنیں۔لباس اور خوراک میں سادگی اختیار کریں۔حقوق اللہ یعنی نماز ‘ حقوق العباد بالخصوص گھر والوں کی ضرویات کا لازمی خیال کریں تاکہ دنیا و آخرت میں اطمینان نصیب ہو۔جہاں تک ہو سکے لغویات سے بچیں‘کم اور آہستہ بولیں‘نگاہ کو نیچا رکھیں۔ سماعت بصارت کو ناجائز اور فضول چیزوں سے بچائیں۔ غلط جگہ پر جانے سے قدموں کو روکنے کی ہر ممکن کوشش کریں‘شہوانی خواہشات پر کنٹرول کریں۔
یہ وہ چند راہنما اصول ہیں جن پر عمل کر کے ہم جسمانی اور روحانی طور پر اپنی صحت کو بہتر بنا کر بہترین زندگی گزار سکتے ہیں جس سے ہماری دنیا و آخرت دونوں سنور جائیں۔