طبی ماہرین کے مطابق ”خوبانی“ چاہے تازہ ہو یا خشک انسانی صحت کیلئے حیرت انگیز فوائد کا حامل اور غذائیت سے بھر پور ایک پھل ہے جس کا استعمال آنکھوں‘ آنتوں‘ بخار اور سرطان جیسے امراض میں اکسیر ہے۔خوبانی میں وٹامن اے بڑی مقدار میں پایا جاتا ہے اسی لیے اس کا استعمال کمزور نظر کو تیز کرتا ہے، اعصابی کمزوری سے تحفظ فراہم کرتا ہے، گھٹنوں، جوڑوں ‘پٹھوں کے درد سے محفوظ رکھتا ہے اور دل و دماغ کو طاقت بخشتا ہے۔خوبانی کا استعمال ہمیں بہت سے امراض سے محفوظ رکھتا ہے۔آئیے! اس پھل کے کچھ اہم اور خاص فوائد کے متعلق جانتے ہیں۔
حاملہ خواتین کے لئے مفید
خوبانی انتہائی غذائیت سے بھرپور ہوتی ہے‘ یہی وجہ ہے کہ حمل کے دوران ان کا استعمال بہت مفیدہے۔ یہ آئرن اور کاپر سے بھی بھرپور پھل ہے۔ حمل کے دوران خاص طور پر یہ اہم غذائی خوراک ماں کو دینی چاہیے‘ اس سے بچے کی نشوونما میں بہتری آتی ہے کیونکہ یہ پھل اس دوران ہونے والے مہلک نتائج کو روکنے میں مدد کرتا ہے۔
بے شمار پیچیدہ امراض کا علاج
نزلہ، زکام، گلے کی خرا ش اورمنہ کی بد بو دور کرنے کے لیے روزانہ دس دانہ خشک خوبانی ہمراہ گرم پانی استعمال کرنا مفید ہوتا ہے۔ خوبانی میں شامل لائکوپین کا جز دل کے لیے مضر کولیسٹرول ایل ڈی ایل کی سطح کم کرکے شریانوں کو صاف رکھتا ہے۔ واضح رہے کہ اس جز کو ایک اہم مانع سرطان کے طور پر بھی مفید اور مؤثر تسلیم کرلیاگیا ہے۔ شریانوں کے صاف رہنے سے دل کولیسٹرول اور دیگر زہریلے اثرات سے محفوظ رہتا ہے۔ اس کے علاوہ موٹاپا لاحق نہیں ہوتا اور ذیابیطس کاخطرہ بھی دور ہوجاتا ہے۔
جوانی، طاقت، فٹنس کے لئے لاجواب
3عدد خشک خوبانی اور 1 عدد چھوہارہ لیں ان کے چھوٹے چھوٹے ٹکڑے کر لیں رات کو ایک کپ پانی میں بھگو لیں صبح اس میں ایک چمچ شہد ملا لیں،اگر سردی کا موسم ہو تو نیم گرم کرکے پی لیں، اگر گرمی کا موسم ہو تو گرم نہ کریں اور ایسے ہی پی لیں۔یہ نسخہ جوانی کو برقرار کھنے‘طاقت اور فٹنس کے لئےبہت لاجواب ہے۔
بدہضمی دور
خوبانی غذائی ریشہ سے بھرپور ہوتی ہے اور یہ ہاضمہ کے لیے بہترین ثابت ہوتی ہے۔ اس پھل میں شامل فیٹی ایسڈتیزی سے آنتوں کی صفائی کرتے ہوئے انہیں مختلف بیماریوں سے محفوظ رکھتے ہیں۔ غذائی ماہرین تجویز کرتے ہیں کہ جن افراد کا معدہ کمزور ہو وہ کھانا کھانے سے قبل چند دانے خوبانی استعمال کریں تو بد ہضمی اور پیٹ کے جملہ امراض میں شفا ملتی ہے۔ خوبانی کھانے سے قبض کی شکایت بھی دور ہوتی ہے
پیٹ کے کیڑے ختم
بچوں کو زیادہ تر پیٹ کے کیڑوں کا سامنا کرنا پڑتا ہے، جب کہ بعض اوقات بڑوں کو بھی اس مسئلے کا سامنا کرنا پڑ سکتا ہے۔ پیٹ کے کیڑوں سے چھٹکارا پانے کے لیے ہر روز پچاس گرام خشک خوبانی کے ساتھ سبز چائے نہار منہ استعمال کریں۔ کچھ دن میں پیٹ کے کیڑے ختم ہونا شروع ہو جائیں گے اور جلد ہی مکمل نجات مل جائے گی۔