ماہنامہ عبقری - جولائی 2009ء

سبحان اللہ خان صاحب کے عمل سے فائدہ الحمد للہ کچھ عرصہ سے میں ماہنامہ عبقری پڑھ رہا ہوں کچھ عرصہ پہلے عبقری میں مذکورہ بالا صاحب کا ایک عمل چھاپا گیا تھاجو کہ یہ ہے۔ ایک بار سورة الفاتحہ اور تین بار سورة اخلاص اوّل و آخر تین بار درود شریف۔ میں نے پڑھا اس کے فوائد نیچے بیان کر رہا ہوں۔ میرے زرعی رقبہ میں اسکارپ ڈیپارٹمنٹ کا ٹیوب ویل لگا ہوا ہے اس کے سارے پارٹس یعنی ٹرانسفارمر اور پینل بورڈ 5,4 سال پہلے چوری ہو گئے تھے۔ بڑی کوشش کے بعد وہ سارے پارٹس محکمے نے دوبارہ لگوا دیئے مگر بدقسمتی سے تقریباًایک سال بعد دوبارہ چوری ہو گئے۔ اب تو میں پریشان ہوا کہ دوبارہ محکمہ میری زمین والے ٹیوب ویل کے پارٹس مشکل سے لگائے گا ‘ سرکاری محکمے میں جب تک تگڑی سفارش نہ ہو تو کام بڑی سست رفتاری سے ہوتا ہے میں نے یہ عمل پڑھا اور دعا کی۔ اللہ پاک نے دست قدرت سے مہربانی کی یعنی محکمے کے پراجیکٹ ڈائریکٹر نے پتہ نہیں کیسے سپیشل طور پر یہ ہدایات ایکسین صاحب کو دی تھیں کہ وہ (میرے زرعی رقبہ والے علاقے کے) سارے سرکاری ٹیوب ویل دو دن میں ٹھیک دیکھنا چاہتے ہیں اور میں نے اپنی آنکھوں سے اپنے رقبہ کے ٹیوب ویل کو دوبارہ چلتا ہوا دیکھا اور اللہ پاک کا شکر ادا کیا۔ اسی عمل کے سلسلے میں دوسرا واقعہ یہ ہے کہ میرے ایک رشتہ دار سے مجھے کسی فتنہ کا اندیشہ تھا۔ میں نے اللہ پاک سے اس عمل کے کرنے کے بعد دعا کی اور میرے کریم رب تعالیٰ کی مہربانی سے میرے دل سے اس کا اندیشہ ختم ہو گیا اور وہ میرا رشتہ دار جو خوامخواہ مجھے نقصان پہنچانے میں لگا ہوا تھا میرے راستے سے ہٹ گیا۔ پچھلا صفحہ