ہر ماہ توحید و رسالت سے مزین مشہور عالم کتاب کشف المحجوب سبقاً حضرت حکیم صاحب مدظلہٗ پڑھاتے ہیں اور مراقبہ بھی کرواتے ہیں۔قارئین کی کثیرتعداد اس محفل میں شرکت کرتی ہے۔ تقریباًدو گھنٹے کے اس درس کا خلاصہ پیش خدمت ہے۔

پیرعلی ہجویری رحمۃ اللہ علیہ نے اس باب میں استعانت یعنی مددکو بیان کیا ہے۔ استعانت کیا ہے ؟ وہ یہ ہے کہ ہر پل،ہر سانس ،ہر لمحہ اورہر لحظہ ہمیں مدد کی ضرورت ہے۔ حفاظت مددہےاور مدد کے بغیر حفاظت نہیں ہو سکتی۔ کفایت!یعنی ضرورتوں کاپورا ہو جانا مدد ہے۔ کفالت! دن اچھا گزرے، رات اچھی گزرے ،سہولت سے گزرے، سکھ میں گزرے، مدد ہے۔ حفاظت بھی مدد ہے،کفایت بھی مدد ہےاور کفالت بھی مدد ہے۔ حادثات و بلیات سے بچے رہنا، دشمن کے شر سے بچے رہنا، جادوجنات کی شرارت اور اسکے نقصانات سے بچے رہنا یہ بھی مددہے۔ ہر پل اور ہر سانس مدد کے بغیر ہمارا گزارا نہیں۔اور کس کی مدد؟ اللہ جل شانہٗ کی مددکیونکہ اللہ جل شانہٗ کی مدد کے بغیر ہمارا گزارا نہیں۔ بندےکا اللہ کے سوا کوئی مدد گار نہیں۔’’لَا مَلْجَأَ وَلَا مَنْجَامِنَ اللہِ اِلَّا اِلَیْہِ ‘‘ یہ صرف اور صرف اللہ کی مدد ہے۔اے اللہ....! تو ہے اور تیرے سوامیرا کوئی ساتھی ہے ہی نہیں، میرا کوئی مدد گار ہے ہی نہیں۔
خواجہ قطب الدین بختیار کاکی رحمۃ اللہ علیہ کابیان فرمودہ اسم اعظم:خواجہ قطب الدین بختیار کاکی رحمۃ اللہ علیہ نے جبکہ ایک دفعہ خدام اور مریدین ان کی خدمت میں بیٹھے ہوئے تھے۔ ان سے فرمایا تمہیں اسم اعظم بتائوں؟تو سارے خوش ہو گئے کہ ہم نے سنا ہے کہ ہمارے حضرت کے پاس اسم اعظم ہےاور اسم اعظم اس اسم کو کہتے ہیں جس کو پڑھ کے اسی وقت جو مانگو جس طرح مانگو، جتنا مانگو، جو من میں آئے اس وقت قبول ہو جائے اس کو اسم اعظم کہتے ہیں۔ تو سب نے پوچھا حضرت اسمِ اعظم عنایت فرمائیں ۔ تو شیخ رحمۃ اللہ علیہ نے فرمایا کہ دل کو ماسوااللہ سےخالی کر دو، مکمل طور پر خالی کر دو۔ اللہ کی ذات کے علاوہ سے دل کو خالی کر دو۔ پھر اس دل کواللہ کی طرف متوجہ کر کے جو مانگو گے، مل جائے گا اور پھر فرمایا کہ دل کو اللہ کے غیر سے خالی کر کے تو دو نفل پڑھ ایسے دو نفل کائنات کے وہ فیصلے کرا دیں گے جو تو چاہتا ہے۔خواجہ قطب الدین بختیار کاکی رحمۃ اللہ علیہ نے مزید فرمایا کہ دل میں اللہ کا غیر ہے تو چاہے سو نفل پڑھ لے کوئی فائدہ نہ ہوگا، کوئی نفع نہ ہو گا۔ کیوں؟ اللہ سے بڑا غیرت والا کوئی نہیں ہے ۔