محترم حکیم صاحب السلام علیکم! الحمدللہ آج آپ کا بتایا ہوا وظیفہ سوا لاکھ مکمل کرلیا ہے اور میں اس وظیفے کو کبھی بھی مکمل نہ کرپاتی اگر اللہ پاک کی مدد اور آپ کی ہمدردی اور رہنمائی نہ ملتی‘ میرے لیے خصوصی دعا فرمائیں کہ اللہ پاک اس وظیفے کو میرے اور میرے گھر والوں کیلئے دنیا و آخرت میں نجات کا ذریعہ بنادے اور اس کے پڑھنے میں کوئی کمی بیشی‘ سستی ہوگئی ہو تو معاف فرما کر اپنی بارگاہ الٰہی میں قبول فرمائے اور اس وظیفے کی برکت سے ہمارے سارے مسائل کو حل کردے۔
محترم حکیم صاحب! میرے اوپر جس قسم کا جادو ہوا تھا اس کا ٹوٹنا ناممکن تھا لیکن اللہ پاک نے اسے آپ کے ذریعے سے توڑنا ممکن بنادیا اور آپ کے پاس ہی آکر مجھے پتہ چلا ہے کہ میں کچھ بھی محسوس نہیں کرسکتی تھی‘ پتھر کا مجسمہ ہوں‘ بالکل بیکار ہوں‘ آپ نے میرا لاکھوں کا کام صرف اور صرف انسانی ہمدردی کے تحت فی سبیل اللہ کیا آپ کے اور آپ کے گھر والوں کیلئے ہمیشہ دعائیں کرتی رہوں گی۔ آپ کی نیت بہت ہی خالص ہے آپ کا مقصد صرف اور صرف اللہ کی رضا کیلئے کام کرنا ہوتا ہے ایسی خالص نیت والا انسان میں نے آج تک کبھی زندگی میں نہیں دیکھا۔
ویسے تو میں نے زندگی میں کوئی بھی اچھا عمل نہیں کیا بس ایک ہی عمل یاد ہے جو میں کرتی ہوں میں ہر نماز میں کوئی بھی سورۂ پڑھنے سے پہلے سورۂ اخلاص ضرور پڑھتی ہوں‘ شاید میرا یہی عمل ہے جس کی بدولت اللہ پاک نے مجھے اتنی بڑی دلدل سے نکالا ۔میری ساری زندگی جنات و شیاطین کی قید میں گزرگئی‘میری زندگی بڑے کرب کی حالت میں گزری ہے‘ تھوڑی سی زندگی رہ گئی ہے اس میں کاش اب کسی ایسے شخص کا ساتھ نصیب ہوجائے جو دین کی مکمل سمجھ رکھتا ہو‘ جس کے ساتھ رہ کر میں آخرت کیلئے کچھ کرسکوں جس کو میں قرآن پاک سنا سکوں‘ قرآن پاک اور حدیث شریف کا ترجمہ بالکل بھول چکی ہوں وہ بھی پھر سے یاد کرسکوں‘ در س دینے کی بہت ہی خواہش ہے دعا کریں اللہ پاک میری ان تمام نیک خواہشات کو پورا فرمادے۔ آمین۔ محترم حکیم صاحب میرا نام شائع مت کیجئے گا۔