(محمد منیر حسین، منڈی بہائوالدین)

محترم حضرت حکیم صاحب السلام علیکم!عبقری رسالہ میں اکثر سورۂ قریش کے فوائد پڑھتا ہوں‘ آج میں بھی سورئہ قریش کی فضیلت بیان کرنا چاہتا ہوں‘ میںگجرات اپنے ایک رشتے دار سے ملنے گیا۔ شاہین چوک سے منڈی کی ویگن مل جاتی ہے لیکن وہ سواریوں کے لیے عذاب سے کم نہیں کنڈیکٹر آدھے راستے میں اُتار کر دوسری بس میں سوار کروا دیتا ہے جس سے سواریوں کو مشکلات کا سامنا کرنا پڑتا ہے‘ میں اس اذیت سے بچنے کے لیےکھڑا سورئہ قریش پڑھ رہا تھا اور اللہ تعالیٰ سے دعا کررہا تھا کہ مجھے کوئی ایسی وین ملے جو منڈی تک جائے۔ اتنے میں عصر کی اذان ہوئی ساتھ ہی جی ٹی روڈ پر مسجد ہے میں باجماعت نماز پڑھ کر آیا تو پھر ویگن کیلئے کھڑا ہوگیا اور سورئہ قریش پڑھنا شروع کردی اتنے میں ایک آدمی آیا مجھ سے پوچھنے لگا کہ منڈی جانا ہے میں نے کہا کہ ویگن کدھر ہے اس نے کہا کہ میرے پاس اپنی کار ہے اور تم فلاں کے بھائی ہو؟ میں نے کہا ہاں۔ اس نے اپنا تعارف کروایا کہ میرا بھائی کالج میں سپرنٹنڈنٹ ہے۔ میری اس سے اچھی سلام دعا تھی ‘ میں گاڑی میں بیٹھا اس نےگھر سے 500 میٹر دور آکر اتارا اور بتایا کہ یہ میرا گاڑیوں کا شوروم ہے ‘ سورئہ قریش کی برکت سے اللہ کا خاص کرم ہوا۔میں ایک گھنٹے میں پہنچ گیا نہیں تو تین گھنٹے لگ جاتےہیں۔
سورۂ فتح کی برکت سے عمرہ کرلیا
جب سے درس میں اس آیت ’’لَـقَدْ صَدَقَ اللہُ رَسُوْلَـهُ الرُّؤْيَا بِالْـحَقِّ لَتَدْخُلُنَّ الْمَسْجِدَ الْـحَرَامَ اِنْ شَآءَ اللّهُ اٰمِنِيْنَ مُـحَلِّقِيْنَ رُءُوْسَكُمْ وَمُقَصِّرِيْنَ لَا تَـخَافُـوْنَ فَعَلِمَ مَا لَمْ تَعْلَمُوْا فَـجَعَلَ مِنْ دُوْنِ ذٰلِكَ فَتْحًا قَرِيْبًا ‘‘(سورئہ فتح، آیت ۲۷) کی فضیلت سنی تو حج یا عمرہ کی نیت سے میں نے پڑھنا شروع کردی ایک صبح میں پھوپھی کے گھر گیا تو پھوپھی نے پوچھا کہ تمہارا پاسپورٹ بنا ہے۔ میں نے کہا پاسپورٹ تو بنا ہوا ہے لیکن اس کی مدت ختم ہوگئی ہے۔ پھوپھی نے کہا کہ یہ پیسے لو اور پاسپورٹ بنوائو تم نے عمرہ پر جانا ہے۔ پھوپھی کی بیٹی اور داماد جو کہ میرا بھانجا ہے۔ عمرہ پر جارہے ہیں میری بہن بھی جارہی تھی یعنی بھانجے کی اماںپھوپھی نے مجھے ٹکٹ اور سعودی عرب کا پورا خرچ دیا تو یوں میں عمرہ پر چلا گیا‘ میرے مالی حالات تھوڑے تنگ چل رہے تھے کیونکہ میرے دو بچے یونیورسٹی میں پڑھ رہے تھے ان کی فیس اور خرچہ بہت ہے لیکن اس آیت کی برکت سے میں عمرہ کرآیا۔محترم حکیم صاحب! آپ کو اور آپ کی پوری عبقری کی ٹیم کو دعائیں دیتا ہوں جن کی وجہ سے بھٹکے ہوئے راستے سے سیدھے راستے پر آگیا ہوں اللہ تعالیٰ تسبیح خانہ کو تاقیامت قائم و دائم رکھے۔ آمین۔