محترم حضرت حکیم صاحب السلام علیکم! میں نے گزشتہ رمضان المبارک تسبیح خانہ لاہو رمیں گزارا۔ بہت سکون ملا‘ میرے روزے بہت بہترین گزرے۔ ایسے روزے‘ عبادت‘ تلاوت پہلے میں نے کبھی نہ کی تھی جو اس مرتبہ ہوئی۔ تسبیح خانہ سے میں بہت کچھ لے کر گیا ہوں۔ ماہنامہ عبقری ہم بہت شوق سے پڑھتے ہیں۔ میرے پاس چند روحانی ٹوٹکے ہیں جو میں قارئین عبقری کی نذر کرتا ہوں۔ یقیناً قارئین ان ٹوٹکوں سے بھرپور استفادہ فرمائیں گے جو میرے لیے صدقہ جاریہ ہوگا۔
سر درد کا روحانی انوکھا ٹوٹکہ: اگر کسی کے سر میں درد ہو تو اس کی پیشانی پر پانچ مرتبہ دائیں ہاتھ کی شہادت کی انگلی سے یَابُدُّوْحلکھیں۔ پہلے دو دائیں طرف اور دو بائیں طرف اور ایک مرتبہ درمیان میں لکھیں اور مریض کو کہیں کہ سر کو ہلائے‘ درد جہاں جائے وہاں یَابُدُّوْح لکھیں۔ اس عمل سے ان شاء اللہ درد جاتا رہے گا۔سردرد کیلئے: اگر سر میں درد ہو تو اول وآخر طاق مرتبہ درودشریف پڑھ کر 14 مرتبہ ایک ہی سانس میں یَاوَھَّابُ پڑھ کر دم کریں۔ ان شاء اللہ کچھ ہی دیر میں سردرد جاتا رہے گا۔
پیٹ میں درد کا لاجواب آزمودہ عمل: اگر کسی کے پیٹ میں شدید درد ہو تو اول و آخر درودشریف پڑھ کر سورۂ فیل (پ30) طاق مرتبہ دائیں ہاتھ میں مٹھی میں دم کرکے پیٹ پر ہاتھ پھیردیں تو ان شاء اللہ 5 منٹ کے اندر اندر درد ختم ہوجائے گا۔ یہ میرا اپنا آزمودہ عمل ہے۔ مجھے اپنے علاقہ کے ایک سید نے یہ عمل بتایا تھا۔ (خضر حیات‘ ڈیرہ اسماعیل خان)