(حکیم ضیا ء الرحمٰن‘ ملتان)

ستمبر! تاریخ پاکستان کا ایک یادگار مہینہ‘ جب پاکستانی قوم پر یہ بھید کھلا کہ جذبہ زندہ ہو تو بڑی سے بڑی مشکل بھی آسان ہوجاتی ہے۔ جب ہندوستانی حکمرانوں پر یہ بھید کھلا کہ پاکستانی قوم میں میدان جنگ میں داد شجاعت دینے والا وہی جذبہ موجود ہے جو آج سے چودہ سو سال پہلے نبی آخر الزمان ﷺ نے ایک آوارہ و گمراہ قوم میں اپنے عمل اور زبان سے بیدار کیا تھا۔ اس دن پاکستانی قوم نے یہ ثابت کردیا کہ کفر کی عددی قوت اور اسلحہ کی برتری کے باوجود ہم ایک متحد اور ایمان کی حرارت رکھنے والی ایسی مضبوط چٹان ہیں جس سے سر تو ٹکرایا جاسکتا ہے اسے ریزہ ریزہ نہیں کیاجاسکتا۔ ستمبر 1965ء کی جنگ میں ہم دشمن کے مقابلے میں بہت تھوڑے اور اسلحہ و بارود کے لحاظ سے انتہائی کمزور تھے پھر بھی ہم نے ارض پاک کو بچالیا‘ جب خوف و ہراس میں مبتلا ہوکر لاہور اور سیالکوٹ وغیرہ سے بھاگ جانے کے بجائے لوگ صرف کلہاڑیاں‘ لاٹھیاں اور پتھر لے کر محاذوں کی طرف اٹھ دوڑے تھے اور ہمارا دشمن سمجھ گیا کہ اس قوم کو میدان جنگ میں شکست نہیں دی جاسکتی۔یہ تو بات تھی 1965 کی۔ اب موجودہ حالات کے تناظر میں ضرورت ایسے مخلص اور قوم کا حقیقی درد رکھنے والے مجاہدوں کی ہے جو قوم میں ایک دفعہ بھی چھ ستمبر1965ء والا جذبہ بیدار کرکے انہیں اندھیروں سے اجالوں کی طرف اور مایوسی سے امید کی طرف لاسکیں۔ ہر کام کیلئے حکومت کی طرف دیکھنا ہی آخر کیوں ہماری کمزوری بن گیا ہے؟ بہت سے ایسے کام جو حکومتی تعاون اور مدد کے بغیر کیے جاسکتے ہیں۔ پرانا سہی لیکن صاف ستھرا لباس پہننا‘ گلیاں کچی سہی مگر انہیں صاف ستھرا رکھنا‘ روزانہ ہلکی پھلکی ورزش سے اپنے آپ کو چاق وچوبند رکھنا‘ اپنے بچوں کی صحیح نشوونما کرنا اور انہیں صحت مند زندگی سکھانے کے گُر سکھانا‘ ہر کسی سے خندہ پیشانی سے ملنا اور جہاں تک ہوسکے ایک دوسرے کے دکھ درد میں کام آنا وغیرہ۔ اس بات کو یاد رکھنے کی ضرورت ہے کہ مسلمان ہروقت حالت جنگ میں رہتا ہے‘ میدان جنگ میں دشمن کے خلاف‘ حالت امن میں معاشرتی برائیوں اور امراض کےبڑھتے ہوئے سیلاب کے خلاف اب جبکہ وطن عزیز مختلف معاشرتی برائیوں کے امراض کےچنگل میں بُری طرح گھرچکا ہے بحیثیت مسلمان ہمارا فرض ہے کہ ان برائیوں کے خلاف ڈٹ جائیں اور اپنے گھر‘ شہر اور ملک سے ان دشمنوں کو نکال باہر کریں اور ثابت کردیں کہ ایک مسلمان کے اندر اچھے جذبے ہمیشہ زندہ رہتے ہیں وہ مرا نہیں کرتے ہم ایک زندہ قوم ہیں اور انشاء اللہ پائندہ قوم کی طرح بہادری سے زندہ رہیں گے۔