محترم حضرت حکیم صاحب السلام علیکم! ہمارے گاؤں میں عبقری رسالہ بہت ہی شوق سے پڑھا جاتا ہے‘ میری تمام سہیلیاں اور ماموں زاد بہنیں عبقری کی دیوانی ہیں۔ مجھے فخر ہے کہ اپنے گاؤں میں سب سے پہلے عبقری میرے والد صاحب لے کر آئے اور انہی کی محنت سے لوگوں نے عبقری سے فیض اٹھایا‘ ہمارے خاندان میں خواتین اور مردوں کے بال بہت گھنے‘ مضبوط اور سیاہ ہیں‘ خاص طور خواتین کے بال لمبے‘ گھنے‘ سیاہ اور چمکدار ہیں‘ قارئین! میں کسی شیمپو کی مشہوری نہیں کررہی بلکہ آپ کو اس کا راز بتارہی ہوں کہ آخر وہ کون سے ٹوٹکے ہیں جن کی وجہ سے ہماری خواتین کے بال بہت خوبصورت ہیں‘ الحمدللہ میرے بال بھی باقی خواتین کی طرح ہی لمبے او ر گھنے ہیں‘ اس کی وجہ ہماری بڑی بوڑھیاں ہیں جو نسل در نسل ہمارے بالوں میںدیسی ٹوٹکے اور نسخہ جات آزماتی اور لگاتی ہیں‘ آپ حیران ہوں گے میری والدہ نےابھی کل ہی میرے بال چاٹی کی لسی سے دھوئے ہیں‘ اس کے علاوہ جو دیسی ٹوٹکے ہمارے ہاں استعمال ہوتےہیں جو بھی مجھے یاد ہیں وہ میں لکھ رہی ہوں۔
٭خشک بالوں کی خشکی دور کرنے کے لیے ناریل کے نیم گرم تیل سے ان میں اچھی طرح مالش کریں۔
٭مہندی اور ناریل کا تیل برابر مقدار میں ملا کر لگانے سے بالوں کی خشکی دور ہو جاتی ہے۔
بالوں کی چکنائی ختم کرنے کا لیپ
٭ چکنے بالوں کی چکناہٹ سے نجات حاصل کرنے کے لئے ملتانی مٹی میں ذرا سا پانی ڈال کر اس میں ایک ترش لیموں نچوڑ لیں اور اس آمیزے کا لیپ بالوں کی جڑوں میں کریں اس کے بعد بالوںکو نیم گرم پانی سے دھوئیں خیال رکھیں کہ پانی بہت زیادہ گرم نہ ہو۔ سر سے زائد ازضرورت چکناہٹ دور ہو جائے گی۔
٭اگر بال جھڑنا شروع ہو جائیں تومکھن میں نمک ملا کر اچھی طرح سر کی مالش کریں اور تھوڑی دیر بعد نیم گرم پانی سے دھو ڈالیں۔ چند مرتبہ ایسا کرنے سے بالوں کی مضبوطی میں اضافہ ہوگا اور جھڑنا بند ہو جائیں گے۔
گرتے بالوں کو روکنے کا بہترین ٹوٹکہ
٭سیکاکائی، میتھی کے بیج اور ماش کی دال کی پیس کر اس میں پانی ڈالیں اور سر پر لگائیں گرتے بالوں کو روکنے کا بہترین ٹوٹکہ ہے۔
٭چاٹی کی لسی یادہی کی لسی سے دھونے سے بال لمبے ہوتے ہیں۔٭چائے کے ٹھنڈے قہوے سے بالوں کو دھونے سے بال لمبے اور گھنے ہو جاتے ہیں۔
کافور لگائیں بچوں کےسر سے جوئیں ختم
٭بالوں کی لمبائی میں اضافہ کرنے کے لیے کریلے کی جڑ پیس کر بالوں میں لگانا مفید ہے۔٭کافور کا عرق سرسوں کے تیل میں ملا کر بالوں میں لگانے سے جوئیں مر جاتی ہیں۔
٭بالوں میں مہندی لگانے سے سر کی گرمی دور ہو جاتی ہے اور بال لمبے بھی ہوتے ہیں۔

کافور کا تیل سرسوں میں ملا کر لگائیے !جوئیں ختم