محترم حضرت حکیم صاحب السلام علیکم! بندہ کھجور کے بارے لکھ کر آپ سے عبقری میں جگہ پانے کا خواہش مند ہے۔ قبول فرمائیں۔ کھجور کے کئی علاقے‘ کئی رنگ‘ کئی قدو قامت‘ کئی ذائقے اور کئی شکلیں ہیں اس کے فوائد میں بھی اختلاف اور کمی بیشی ہے۔ اس بحث کو چھوڑ کر ہم اس کے فوائد کی بات کریں گے۔ مفہوم حدیث ہے کہ آدم علیہ السلام کے جسم اقدس بنانے کے بعد جو مٹی بچی اس سے اللہ کریم نے درخت کھجور بنادیا‘ اس سے آپ اس کی تکریم و فوائد کا اندازہ لگالیں۔ اس کے بارے میں محدثین اور حکماء صاحبان نے بے شمار فوائد اور واقعات لکھے ہیں۔ یہ مبارک پھل مردانہ کمزوری کی بہترین دوا، بدن کو قوی اور موٹا کرتی ہے۔ مقوی اعصاب ہے جوڑوں کے درد میں شافی، کھجور جی بھر کر کھائیں پیٹ درد نہ ہوگا۔ دودھ میں جوش دے کر کھجور کھالیں دودھ نیم گرم پی لیں۔ گرمیوں میں یہ عمل کم کریں سردیوں میں روزانہ کرلیں۔ کمزوری باہ میں اس کی معجون آردخرما استعمال کریں کمزوری باہ کے علاوہ پورے وجود کو تقویت دے گی۔ مقوی اعصاب ہونے کی وجہ سے بلغمی امراض مثلاً درد کمر‘ ہڈیوں کی کمزوری اور درد میں نافع و شافی ہے۔ بلغم کو دور کرتی ہے۔ سرد مزاجوں میں بے حد مفید ہے۔ 41 گٹھلیاں ایک کلو دودھ میں ہلکے جوش کے لیے آگ پر رکھ دیں۔ جب دودھ آدھا رہ جائے تو نیم گرم رات کونوش جان فرمالیا کریں چائے یا پانی میں جوش دے کر پینا افادیت کم کردیتا ہے۔ وٹامن اے‘بی اور فولاد بھی اس میں ہے۔ عجوہ کھجور محدود مقدار میں یا وزن میں مدینہ منورہ میں پیدا ہوتی ہے۔ سورئہ النحل میں ارشاد ہے ترجمہ’’وہ (اللہ کریم) زمین سے تمہارے لیے کھیتیاں اور زیتون اور کھجور اور انگور اور ہر قسم کے پھل اگاتا ہے۔‘‘ کھجور کا متبرک ہونا‘ شافی ‘نافع ہونا‘ افادیت کا حامل ہونا قرآن کریم میں سورئہ الانعام، النحل، اسرائیل، مریم، طٰہ، الشعرا، ق، القمر اور سورہ مبارکہ عبس اور ہم نے اگائے تمہارے لیے اجناس‘ انگور‘ ترکاریاں اور زیتون اور کھجوریں کیونکہ باغات گھنے ہوں گے۔ حضرت عائشہ صدیقہؓ بیان فرماتی ہیں نبی کریمﷺ نے فرمایا جس گھر میں کھجور ہو وہ گھر والے کبھی بھوکے نہ رہیں گے۔ فرمایا نبی کریمﷺ نے اے عائشہؓ جس گھر میں کھجور نہ ہو اس گھر والے بھوکے ہیں‘ انہوں نے یہ بات دو یا تین بار فرمائی اس گھر والے بھوکے ہیں۔ حضرت سلمیٰؓ فرماتی ہیں: نبی کریمﷺ نے فرمایا جس گھر میں کھجوریں نہ ہوں وہ گھر ایسا ہے جیسے اس میں کھانا نہ ہو۔ ابن ماجہ میں حدیث مبارک ہے رات کا کھانا ہرگز نہ چھوڑو خواہ اک مٹھی کھجور ہی کھا لو کیونکہ رات کا کھانا چھوڑنے سے بڑھاپا طاری ہو جاتا ہے۔
حضرت اسماء بنت ابوبکر صدیقؓ کے بیٹے عبداللہ بن زبیرؓ قبا میں پیدا ہوئے تو حضرت اسماءؓ نے ان کو نبی کریمﷺ کی گود میں ڈال دیا آپ نے کھجور چبا کر پھر اپنا لعاب مبارک اور کھجور بچے کے منہ میں ڈال کر اس کے تالو سے لگایا پھر بچے کے لیے برکت کی دعا کی یہ وہ پہلا بچہ تھا جو مسلمانوں میں پیدا ہوا۔ حضرت عائشہ صدیقہؓ کے بیان میں (مسلم) فرمایا نبی کریمﷺ نے اس عظیم کھجور عجوہ میں ہر بیماری سے شفا ءہے اور اگر اسے نہار منہ کھایا جائے تو یہ زہروں سے تریاق ہے۔