نسیان اور ضعف دماغ کے مریض متوجہ ہوں:
اس دور پر آشوب میں جہاں ہر طرف نفسا نفسی کا عالم ہے ہر شخص اپنا الوسیدھا کرنے کے چکر میں ہے اور خدمت خلق کے نام پر عوام الناس کو دونوں ہاتھوں سے لوٹا جارہا ہے یہی وہ وقت اور دور ہے کہ ایک مسلمان دوسرے مسلمان کی مدد اور یاوری کرے اور اس کے امراض و علل کے دور کرنے میں ممدو و معاون ہو۔
ایک صاحب مسلسل ضعف دماغ، ضعف بصر اور نسیان کے شاکی تھے۔ مسلسل علاج کرنے کے بعد بھی کچھ فائدہ نہ ہوا۔ احقر نے یہ نسخہ استعمال کرایا فرمانے لگے حکیم صاحب دوا کیا تھی کوئی جادو تھا، شاید آپ نے کوئی آیت یا منتر پڑھ کر دم کردیا تھا۔ اس کے مسلسل استعمال کرنے سے مجھے وہ افاقہ ہوا ہے کہ جو مجھے چھ چھ ماہ قیمتی ادویات کے استعمال کرنے سے بھی نہ ہوا حالانکہ صرف میں نے چالیس دن استعمال کی ہے لیکن فائدہ تو ہفتہ کے استعمال سے محسوس ہوگیا۔
موجودہ مشینی دور میں انسان کا دماغ بھی مشین بن کر رہ گیا ہے۔ مسائل میں ہر طرف گھرا ہوا یہ انسان ان مسائل سے نبرد آزما ہونے کیلئے وسائل کی کوشش کرتا ہے اور دن رات اس کیلئے کوشاں و سرگرداں رہتا ہے لیکن یہ اسے معلوم نہیں کہ مسائل کا حل وسائل کے اندر نہیں بلکہ وہ تو حکیم ایزدی کے تحت ہے۔ یوں اس کا دماغ گھلتا چلا جاتا ہے حتیٰ کہ بات یہاں تک پہنچ جاتی ہے کہ ادھر بات سنی اور فوراً بھول گئی۔ اس کے علاوہ موجودہ دور کے لٹریچر میں ہم نے چربیلی اشیاء خاص طور پر مکھن، دیسی گھی، دودھ کی مذمت سن سن کر اس نعمت کو بالکل ترک کردیا ہے یا پھر یہ نعمتیں خالص ملتی ہی نہیں کم یا ب ہوگئی ہیں حالانکہ یہ اشیاء ہماری صحت کیلئے ضروری ہیں ان کی کمی کی وجہ سے بالوں کا گرنا، جلد کی خشکی اور دماغی خشکی اور کمزوری بے خوابی وغیرہ جیسے امراض پیدا ہوتے ہیں۔ موجودہ دور میں جتنے بھی پاگل خانے ہیں اگر ان پاگلوں کا بطور معائنہ کیا جائے تو ان میں سے بہت زیادہ ایسے مریض ملیں گے جن کی بیماری کی وجہ غذائی توازن میں بے قاعدگی اور بے ترتیبی ہے۔
دواخانہ میں ایک ایسی بچی کو لایا گیا جو پاگلوں جیسی حرکات کرتی تھی حتیٰ کہ اگر کھانا کھلادیں تو کھالیتی ورنہ پڑی رہتی ،دھوپ ہو یا سردی اسے احساس نہیں ہوتا تھا۔ کامل تشخیص کرنے کے بعد مریضہ کیلئے بادام روغن خالص، روغن کدو، روغن خشخاش، روغن کاہو ہم وزن لے کر سر اور کنپٹیوں پر مالش کرائی گئی۔ اسیٍ طرح ہاتھ کی ہتھیلی اورپائوں کے تلوںپر بھی مالش کی گئی اورمریضہ کو یہ نسخہ اکسیر دماغ کھلایا گیا کچھ عرصے بعد وہ بالکل تندرست ہوگئی۔
ویسے بھی مذکورہ نسخہ بے خوابی، ذہنی پریشانی، دماغی کمزوری، نسیان وغیرہ کیلئے اکسیر ہے۔ سینکڑوں ایسے لوگ جو مسلسل بے خوابی کا شکار رہتے تھے۔ انہیں جب مذکورہ نسخہ مسلسل استعمال کرایا تو نشے کی گولیاں چھوٹ گئیں اس کے علاوہ ان گولیوں کے مابعد اثرات سے پیدا ہونے والے عوارضات میں بھی بتدریج افاقہ ہوا ہے۔ ایک آفیسر نے جب مذکورہ پریشانی یعنی بے خوابی کی شکایت کی جب مذکورہ نسخہ کے بارے میں بتایا گیا تو انہیں یقین نہ آیا پھر جب استعمال کیا تو اس نسخے کے اتنے گرویدہ ہوئے کہ اپنے دوستوں کو گفٹ بھیجا۔ اب اس نسخہ دماغی یعنی اکسیر دماغ کے نسخے کی طرف آتے ہیں اس نسخہ کو ہر موسم میں استعمال کیا جاسکتا ہے۔ بعض افراد کو دائمی نزلہ کی وجہ سے بھی نسیان اور ضعف دماغ ہوتا ہے۔ اگر وہ اطریفل اسطو خودوس ۶ گرام صبح و شام نہار منہ ایک ماہ تک استعمال کریں اور پھر یہ نسخہ استعمال کریں تو قدرت ربی کامشاہدہ ہوگا۔ موجودہ نسخہ کے بارے میں ایک عرض کرنا لازمی سمجھتا ہوں کہ یہ ایک صاحب کا راز تھا جسے وہ اپنے گناہوں کی طرح چھپاتے تھے اور یہ نسخہ لوگوں کو بناکردیا کرتے تھے اور اجزاء نسخہ کسی کو نہیں بتاتے تھے حالانکہ وہ طبیب نہیں تھے بس ایک حکیم صاحب کی خدمت پر یہ نسخہ مبارک ہدیہ ملا تھا واقعی لاجواب ہے۔ آپ قارئین کے افادہ کیلئے بلاکم و کاست پیش ہے فائدہ اٹھا کر احقر کو دعائوں میں یاد کریں۔
ھوالشافی مغز بادام شیریں۲۵۰گرام، مغزکدو، مغز خربوزہ، مغز خیار، مغزتربوز ہر ایک ۳۰ گرام ہلیلہ، سیاہ ۲۰ گرام، پوست آملہ خشک۲۰ گرام، پوست بلیلہ ۲۰ گرام، خشخاش ۸۵ گرام، سونف ۱۲۰ گرام، مرچ سفید دکنی۳۰ گرام تمام اجزاء کوٹ پیس کر مصری آدھا کلو ملاکر کشتہ مرجان جواہر دار ۳ گرام اچھی طرح حل کرکے محفوظ رکھیں اور ۲۰ گرام روزانہ صبح و شام نہار منہ استعمال کریں۔
کشتہ مرجان کسی اچھے دواخانہ سے لیں اور مغزیات پرانے نہ ہوں۔ اس کے استعمال میں بادی اور گرم اغذیہ سے پرہیز کریں۔ نیز دماغی سکون اور نیند پوری کریں۔
