محترم حضرت حکیم صاحب السلام علیکم! اللہ پاک آپ کو لمبی عمر عطا کرے ۔ اللہ پاک نے آپ کو ہمارے لیے نجات دہندہ بناکر بھیجا۔ ہم نے آپ کا درس سنا اور ہماری زندگی بدل گئی۔ آپ کا درس اصحاب کہف کا سنا اور وہ دل میں اتر گیا اور اصحاب کہف کے نام اور ان کی برکات۔ میرے دل میں خیال آیا میں اصحاب کہف کے ناموں کی برکات کا فیض حاصل کروں۔
خاوند کے سینے کا درد ختم ہوگیا
میرے خاوند کو چار سال سے اکثر بائیں طرف سینے میں شدید درد ہوتاتھا ای سی جی وغیرہ ٹیسٹ کروائے کوئی بھی فائدہ نہیں ہوا ‘ کچھ عرصہ ادویات کا استعمال کیا مگر بے سود رہے‘پھر میں نے انہی سات ناموں کا دم کیا اور تعویذ بنا کر ان کی دائیں بازو پر باندھ دیا‘ اللہ تعالیٰ نے درد کا نام و نشان مٹا دیا۔اب میرے شوہر بالکل تندرست اور ہشاش بشاش ہیں۔
بیٹی کی بغل میں دانہ اور بہتا کان ٹھیک
میری بیٹی کے ایک سال سے بغل میں دانہ نکلا ہوا تھا جو ٹھیک ہی نہیں ہوتا تھا خون رستا تھا علاج بھی کروایا لیکن کوئی فائدہ نہیں ہوا‘ بے شمار رقم اس مرض پر خرچ کی مگر شفاء نہ ملی‘بچی کی تکلیف دیکھی نہ جاتی تھی‘ تین چار جگہوں سے دم بھی کروایا مگر آرام نہ آیا۔ جب اصحاب کہف کے ناموں کی برکت کا درس سنا اور اپنے شوہر پر آزمودہ تھا تو میں نے اپنی بیٹی کیلئے بھی اسی تعویذ اور انہی بابرکت ناموں کو آزمانے کا سوچا‘یقین کیجئے ان ناموں کی برکت اور اس کا تعویذ لکھ کر باندھنے کی برکت سے میری بچی صرف سات دن کے اندر اندر بالکل ٹھیک ہوگئی‘ دانہ خشک ہوکر ختم ہوگیا۔ اسی طرح اس کے کان میں سے مواد بہتا رہتا تھا‘ اس کو بھی انہی ناموں کا دم کیا اور تعویذ باندھا اللہ کے کرم سے وہ مرض بھی ٹھیک ہوگیا۔
بھانجے کا تیز بخار آدھ گھنٹے میں اترگیا
میرا بھانجا جو گیارہ سال کا ہے بہت شدید بیمار تھا بخار تھا کہ اتر ہی نہیں رہا تھا ۔ میں نے اس پر بھی دم کیا ۔ ان سات ناموں یَمْلِیْخَا۔ مَکْسَلْمِیْنَا۔ کَشْفُوطَطْ۔ تَبْیُوْنَسْ ۔اَذْرَافَطْیُوْنَسْ۔ کَشَافَطْیُوْنَسْ۔ یُوَانَسْبُوْس وکلبھم قطمیر کی برکت سے آدھے گھنٹے کے اندر ہی اسکا بخار اتر گیا اور وہ کھیلنے لگا۔اس کا تعویذ لکھنے کا بالکل سادہ سا طریقہ ہے ایک صفحے پر گول دائرے میں سات اصحاب کہف کے نام لکھیں اور درمیان میں قطمیر لکھیں۔ (عروسہ مدثر، کراچی)