محترم حضرت حکیم صاحب السلام علیکم! میں ایک سکول ٹیچر ہوں اور ماہنامہ عبقری بہت شوق سے پڑھتی ہوں‘ میں گاہے بگاہے اپنی سکول کی بچیوں سے ان کے مسائل پوچھتی ہوں اور ماہنامہ عبقری سے دیکھ کر انہیں وظائف اور ٹوٹکے بتاتی ہوں اور تمام بچیوں کوگھر میں ماہنامہ عبقری لگوانے کا مشورہ توضرور ہی دیتی ہوں۔ الحمدللہ ! سب کو بہت زیادہ فائدہ ہورہا ہے۔کچھ عرصہ پہلے ہمارے سکول ایک نئی پرنسپل آئیں تو ان کے ساتھ کچھ خوشامد ٹیچرز نے مل کر ایک گروپ بنالیا اور ہم چار ٹیچرز(جوکہ آپس میں بہت اچھی دوست ہیں) کے خلاف سازشیں کرنا شروع کردیں‘ روزانہ ہمیں دفتر بلایا جاتا اور چھوٹی چھوٹی باتوں کولے کر ذلیل کیا جاتا‘ ہمارا نوکری کرنا دشوار ہوچکا تھا جبکہ وہ
مخالف ٹیچرز ہمیں دیکھتی اور عجب طریقے سے مسکراتیں۔ ہم تمام ٹیچرز نے اس مسئلے کے حل کیلئے اپنےہر دلعزیز میگزین عبقری سے مدد مانگی تو ماہنامہ عبقری نے ہمیں روحانی محفل کا تحفہ دیا۔ ہم نے خاص توجہ سے روحانی محفل کرنا شروع کردی تو پہلے ہی مہینے ایسی ہوا چلی کہ سکول انتظامیہ نے اس پرنسپل کو ہٹا کر میری ایک سینئر دوست کو پرنسپل لگا دیا اور اس گروپ کی دو ٹیچرز کو نوکری سے ہی فارغ کردیا۔ آج ہم محنت اور دیانتداری سے اپنی نوکری کررہی ہیں اور سکول کا ماحول انتہائی خوشگوار ہے۔ اللہ تعالیٰ نے روحانی محفل کی برکت سے سکول سے تمام سازشیوں کو نکلوا دیا۔ الحمدللہ! (پوشیدہ)
