محترم حضرت حکیم صاحب السلام علیکم! عبقری قارئین کیلئے قرآن پاک کی برکات‘ شان اور برکت کے کچھ آنکھوں دیکھے سچے واقعات لکھ رہی ہوں‘ میری بچپن سے یہ عادت ہے کہ بڑی عمر کی خواتین سے دوستی اچھی لگتی ہے۔ان بڑی بوڑھیوں کے پاس زندگی کا تجربہ ہوتا ہے اس لیے کچھ سیکھنے کو ملتا ہے‘ میری ایک ایسی ہی دوست تھیں‘ بڑی عمر کی‘ وہ بتاتی ہیں کہ ان کی بیٹی قرآن پاک پڑھنے ایک عورت کے پاس جایا کرتی تھی‘ پھر بڑی ہوئی تو اتفاق سے اس کی شادی اسی استاد کے پڑوس میں ہوئی‘ اب میری بیٹی اس استانی کا بہت خیال رکھتی جو بھی پکاتی اس کو بھی بھجواتی‘ ان کے اپنے بچے ملازمت پیشہ‘ شہروں میں بمعہ فیملی رہتے تھے ایک دن جب میری بیٹی بڑی اماں (استانی) کے گھرگئی تو وہ کیا دیکھتی ہے کہ ان کی طبیعت بہت خراب ہے‘ اس نے آس پڑوس کی خواتین کو بلایا کہ آؤ ان کو ڈاکٹر کے پاس لے کر چلیں‘ بس اتنی دیر میں ہی وہ وفات پاگئیں‘ صبح کا وقت تھا‘ ان کا جنازہ مغرب کی نماز کے بعد ہوا‘ اندھیرا ہوچکا تھا‘ جب میت کو قبر میں اتارنے لگے توکیا دیکھا کہ جیسے قبر میں دیا جل رہا ہو‘ ایسی نورانی روشنی تھی سب لوگ حیران رہ گئے۔ بے شک وہ جومحبت اور پیار سے بچوں کو قرآن پاک پڑھاتی تھیں اور خود پڑھتی تھیں یہ اس کی برکت اللہ پاک نےمخلوق کو دکھائی۔ اسی طرح گزشتہ رمضان المبارک کی ستائیس ویں رات تھی‘ ہمارے گاؤں کے ایک شخص نے ساری رات مسجد میں گزاری‘ نوافل‘ نماز‘ تسبیح اور قرآن پاک کی تلاوت کرتے رہے‘ جب سحری کا وقت ہوا گھر گئے‘ سحری کی اور واپس مسجد آگئے‘ مسجد میں پھر نماز فجر کے بعد تلاوت قرآن پاک میں مشغول ہوگئے‘ جب ہلکی ہلکی روشنی ہوئی تو سائیکل نکالی‘ کھیتوں میں جانے لگے جیسے ہی روڈ پر گئے موٹرسائیکل سے ٹکرا گئے اور بالکل معمولی چوٹ آئی مگر ہسپتال لے جانے سے پہلے ہی وفات پاگئے‘ میت گھر آئی‘ علاقہ کے چند لوگ جب قبر کھودنے کیلئے گئے تو جیسے ہی انہوں نے قبر کھودنا شروع کی تو عجیب خوشبو سے سارا قبرستان مہک اٹھا‘ جوں جوں قبر کھودتے جاتے خوشبو بڑھتی جاتی‘ جب لوگوں نے ان کے چہرے کا دیدار کیا تو اللہ کی شان لوگ اکثر دھوکہ کھاجاتے کہ وہ شخص نہیں ہیں‘ ایسا نور‘ ایسی خوبصورتی کہ ہر دیکھنے والا حیران رہ جاتا۔ قارئین! یہ میرے رب کی طرف سے ہمیں پیغام ہے جو میرے کلام سے سچی محبت رکھتا ہے اس کیلئے میرے پاس کیا کچھ ہے۔ بھٹکے ہوئے‘ غفلت میں ڈوبے ہوئے دیکھیں‘ میری طرف آئیں اور اپنی آخرت جہاں ہمیشہ رہنا ہے اس کے بارے میں سوچیں۔ اللہ تعالیٰ ہم سب کو روزانہ قرآن پاک سے سچی محبت‘ اس کی تلاوت کرنے اور اس پر عمل کرنے توفیق عطا فرمائے۔ اللہ تعالیٰ قرآن پاک کے نور کی برکت سے ہماری قبریں بھی روشن کردے۔